Sapar Sataev Temirtaýǵa jańa ákim bolyp taǵaıyndaldy. Buǵan deıin ol Balqash qalasynyń basshysy qyzmetin atqarǵan, dep habarlaıdy infohub.kz.
Qaraǵandy oblysy ákimdiginiń resmı saıtynda habarlanǵandaı, Qazaqstan Respýblıkasy Prezıdentiniń Ákimshiligimen jáne qalalyq máslıhat depýtattarymen kelisý boıynsha Temirtaý ákimi bolyp Sapar Sataev taǵaıyndaldy.
Jańa basshyny qala aktıvine Qaraǵandy oblysynyń ákimi Ermaǵanbet Bólekpaev tanystyrdy. Ol qala basshysynyń aldynda turǵan basym mindetterdi atap ótti.
«Sapar Sataevtyń memlekettik basqarý júıesinde aıtarlyqtaı tájirıbesi bar, áleýmettik-ekonomıkalyq damý máselelerin jaqsy biledi jáne qajetti daǵdylarǵa ıe. Sonymen qatar, Balqashtaǵy jumys tájirıbesi oǵan iri ónerkásiptik kásiporyndarmen tıimdi ózara is-qımyl jasaýǵa múmkindik berdi. Bul tájirıbe Temirtaýda da qala qurýshy metalýrgıalyq kásiporynmen yntymaqtastyqty odan ári damytý úshin sátti qoldanylady dep senemin. Onyń basshylyǵymen jylýmen jáne sýmen jabdyqtaýdy jańǵyrtý, joldardy jóndeý boıynsha aýqymdy jobalar iske asyryldy, bul komýnaldyq ınfraqurylymnyń senimdiligi men kórsetiletin qyzmetterdiń sapasyn edáýir arttyrýǵa múmkindik berdi. Sapar Qaıyrkenuly, sizdiń basty mindetińiz – temirtaýlyqtardyń ómir súrý sapasyn arttyrý, qolaıly jáne qaýipsiz qalalyq orta qurý, sondaı-aq qalanyń turaqty áleýmettik-ekonomıkalyq damýyn qamtamasyz etý», — dedi óńir basshysy.
Sapar Sataev eńbek jolyn 2002 jyly «Qazaqavtojol» respýblıkalyq memlekettik kásipornynda bastady. Ár jyldary «Botaqara sý sharýashylyǵy» komýnaldyq memlekettik qazynalyq kásipornynyń dırektorynyń orynbasary jáne dırektorynyń mindetin atqarýshy bolyp jumys istedi. Memlekettik qyzmette 2010 jyldan beri. Qaraǵandy oblysy Buqar jyraý aýdanynyń Botaqara kentin basqardy. 2013–2015 jyldary Abaı qalasynyń ákimi qyzmetin atqardy, keıin Buqar jyraý aýdany ákiminiń orynbasary boldy. Keıinirek Prıozersk qalasynyń ákimi boldy. 2023 jyldyń mamyrynan jańa laýazymǵa taǵaıyndalǵanǵa deıin Balqash qalasyn basqardy.
Óz kezeginde Sapar Sataev Temirtaýdyń búgingi ómirin, qandaı máseleler erekshe nazar aýdarýdy qajet etetinin jáne turǵyndardyń qandaı sheshimderdi kútetinin jaqsy biletinin atap ótti. «Temirtaý — adal eńbekti, jaýapkershilikti jáne naqty isterdi baǵalaıtyn qala. Meniń qyzmetim de osyǵan baǵyttalady», — dep atap ótti Sapar Sataev.
Eske salaıyq, birneshe kún buryn Ǵalym Áshimov Temirtaý ákimi qyzmetinen ketetinin málimdegen edi. Ol bul laýazymdy 2024 jyldyń qyrkúıeginen beri atqaryp kelgen.