Temirtaýda alty jasar qyz bala oıyn alańynda saýsaǵynan aýyr jaraqat alyp, saýsaǵynan aıyryla jazdady, dep habarlaıdy infohub.kz saıty.
Oqıǵa Ýálıhanov kóshesi, 6-úıdiń mańyndaǵy oıyn alańynda boldy. Jábirlenýshiniń anasynyń aıtýynsha, balanyń qoly syrǵanaqtyń bort pen betkeıiniń arasyndaǵy sańylaýǵa qysylyp qalǵan. Metal jıek saýsaqty qatty qysyp, shyǵarý múmkin bolmaǵan. Eresekter kómekke kelgende, saýsaq qan bolyp, tek taramysynan ilinip turǵan. Ata-anasy qyzdyń qolyn bosatý úshin metal paraqty qaıyrýǵa májbúr bolǵan.
«Qyz eshqashan óz betimen kóshege shyqpaıtyn, al sol kúni biz baqshadan keldik, úıge kirgende, ol qurbylaryna oıyn alańyna barýǵa ruqsat surady. Eshkim onyń syrǵanaqqa shyǵady dep oılamaǵan. Shamamen 2–3 mınýttan keıin esik qaǵylady, qyz qandy saýsaǵymen kirip keledi», — dedi balanyń anasy Anastasıa Korýnnaıa.
Balany jedel túrde aýrýhanaǵa jetkizip, falangalaryna ota jasady. «Biz tez arada jaraqathanaǵa bardyq, bizdi kezeksiz qabyldap, Qaraǵandydaǵy oblystyq balalar aýrýhanasyna barý kerek ekenin aıtty. Otany sol jerde jasaý kerek boldy, óıtkeni ol óz taramysyn kesip alǵan. Qazir balanyń jaǵdaıy turaqty, ýkol salyp, tańyp jatyr, saýsaǵy qımyldap jatyr. Dárigerlerdiń aıtýynsha, eger sheshim qabyldaý jyldam bolmasa, bala saýsaǵynan ómir boıy aıyrylyp qalýy múmkin edi. Ol meniń solaqaı qyzym», — dep qosty qyzdyń anasy.
Qazir balanyń ómirine qaýip bolmaǵan soń, Anastasıa oıyn alańynyń jaǵdaıymen aınalysýdy josparlap otyr. Onyń aıtýynsha, alań kópten beri apatty jaǵdaıda: keıbir elementteri birneshe jyl buryn synǵan, biraq áli de alańda tur. Bul alańdaǵy birinshi baqytsyzdyq emes: balalar únemi qoldaryn syndyryp, tizelerin jaralap, kógergen bolyp qaıtady eken.
Ótken aıda qaladaǵy barlyq balalar alańdary Temirtaý mádenıet jáne demalys parkteri men skverleriniń basqarmasyna berildi. «Biz oıyn qurylǵylaryn kezeń-kezeńmen tehnıkalyq tekserýden ótkizip, jóndeý jumystaryn júrgizip jatyrmyz. Atalǵan fakti boıynsha: balalar alańyn tekserýdi josparlap otyrmyz. Eger syrǵanaqty jóndeý múmkin bolmasa nemese tıimsiz bolsa, demontaj máselesin qarastyramyz», — dedi basqarmadan.
Mamandar Temirtaýdaǵy balalar alańdaryndaǵy oıyn qurylǵylarynyń basym bóliginiń paıdalaný merzimi aıaqtalǵanyn qosty. Tehnıkalyq tekserý qorytyndysy boıynsha qaýipsizdik talaptaryna sáıkes kelmeıtin jáne jóndeýge jatpaıtyn nysandar bólshekteletin bolady.