2026 jylǵy maýsymda Qazaqstanda birneshe kópjyldyq temperatýra rekordtary jańartyldy. Eń «eskisi» — Pavlodardaǵy 71 jyl boıy saqtalǵan rekord, dep habarlaıdy infohub.kz.
Qazgıdromettiń málimetinshe, eldiń basym bóliginde maýsym klımattyq normadan 1–5 gradýsqa jyly boldy. Kóptegen óńirlerde kúndizgi temperatýra +30…+38 °C, al ońtústikte keı jerlerde +43 °C-qa deıin jetti. Sınoptıkter muny qurǵaq tropıktik aýa massalarynyń áserimen túsindirdi. Al Qazaqstannyń batysynda atlantıkalyq sıklondar saldarynan salqyn ári jańbyrly aýa raıy ornady, birqatar aýdandarda jaýyn-shashyn mólsheri normadan 2–5 esege artyq tústi.
1 maýsymda Pavlodarda aýa temperatýrasy +36,8 °C-qa deıin kóterilip, 1955 jylǵy burynǵy maksımýmdy (+36,1 °C) artta qaldyrdy. Sol kúni Almatyda da jańa rekord ornady: +34,5 °C (1967 jyly +34,4 °C bolǵan). 8 maýsymda Astanada termometrler +33,7 °C-qa jetip, 2023 jylǵy rekordtan (+33,6 °C) asyp tústi. 29 maýsymda shyǵysta maksımýmdar jańartyldy: Semeıde +38 °C tirkeldi (burynǵy rekord 1992 jyly +36,7 °C), al Óskemende temperatýra +36,7 °C-qa jetip, 1974 jylǵy kórsetkishten (+36 °C) asty.
Ystyqtan bólek, maýsym rekordtyq jaýyn-shashynmen de erekshelendi. Birqatar óńirlerde táýlik ishinde bir aılyq normadan eki esege deıin jańbyr jaýdy. Mysaly, 3 maýsymda Aqtóbe oblysyndaǵy Oıyl meteostansıasynda aılyq norma 22 mm bolsa, 45 mm jaýyn-shashyn tústi, al Aqtóbede 30 mm norma kezinde 33 mm jaýdy. 9 maýsymda Qostanaı oblysynyń Mıhaılovka stansıasynda táýligine 64 mm (norma 39 mm) jaýyn tirkeldi. 24 maýsymda Jetisý oblysyndaǵy Sarqan stansıasynda 49 mm (norma 40 mm), al 29 maýsymda Soltústik Qazaqstan oblysynyń Tımırázevo stansıasynda 50 mm (norma 42 mm) jańbyr jaýdy.
Astanada aı ishindegi ortasha aýa temperatýrasy +24,4 °C boldy, bul klımattyq normadan (+19,6 °C) 4,8 gradýsqa joǵary. Eń ystyq kún 23 maýsymda tirkeldi — +36,8 °C. Eń tómengi temperatýra 2 maýsym túni baıqaldy: +13,1 °C. Elordada bir aıda 24 mm jaýyn-shashyn tústi, bul normadan (40 mm) tómen.