AQSH-tyń Tennessı shtatynda 50 jastaǵy Krısta Paıktyń ólim jazasy 30 qyrkúıekke belgilendi. Úkim oryndalsa, ol osy shtatta 1819 jyldan beri ólim jazasyna kesilgen alǵashqy áıel atanady, dep habarlaıdy infohub.kz saıty.
Krısta Paık ólim jazasyn kútip júrgenine shamamen 30 jyl boldy. Qazirgi úkim oǵan 1996 jyly, 18 jasynda jasaǵan qylmysy úshin shyǵarylǵan edi.
Tergeý anyqtaǵandaı, 1995 jyly Paık qyzǵanyshtan ózin básekeles sanaǵan 19 jastaǵy kýrstasyn óltirgen. Ol 17 jastaǵy jigitimen birge qurbanyn ormanǵa alyp baryp, jarty saǵat boıy azaptaǵan. Kisi óltirý erekshe qatygezdigimen kózge tústi: marqumnyń denesine satanalyq tańba oıyp jazylǵan, al Paık óltirilgen qyzdyń bas súıeginiń bir bóligin olja retinde alyp ketken.
Sottalǵan áıeldiń qorǵaýshylary úkimniń oryndalýyn sońǵy sátke deıin toqtatýǵa tyrysty. Advokattar shtat gýbernatoryna 226 betten turatyn ótinish joldap, keshirim surady. Zańgerler Paıktyń aýyr balalyq shaǵyn, basynan ótkergen zorlyq-zombylyǵyn, sondaı-aq bıpolárlyq jáne posttravmatıkalyq buzylystar sıaqty psıhıatrıalyq dıagnozdaryn alǵa tartty.
Advokattar ólim jazasy jaraqat alǵan jasóspirim jasaǵan qylmys úshin tym aýyr jaza dep talap etti. Alaıda Tennessı gýbernatory ótinishti qabyldamaı, úkimdi kúshinde qaldyrdy.
Aıta keteıik, Paıktyń sybaılasy 1996 jyly ólim jazasynan qutylyp, ómir boıy bas bostandyǵynan aıyrý jazasyna kesilgen. Sot qylmys jasalǵan kezde onyń kámeletke tolmaǵanyn eskergen.