Amerıkandyq retteýshi NHTSA Tesla kompanıasyn 20 myńǵa jýyq elektromobıldegi jaryq faralardyń shamadan tys jaryqtyǵyna baılanysty aqaýdy joıýǵa mindettedi. Vedomstvo avtóndirýshiniń máseleni eleýsiz dep taný týraly ótinishin qabyldamady, dep habarlaıdy infohub.kz saıty.
AQSH-tyń jol qozǵalysy qaýipsizdigi ulttyq basqarmasy (NHTSA) Tesla kompanıasynyń Model Y jáne Model 3 úlgilerindegi keıbir elektromobılderde jaryq faralardyń jaryqtyǵy ruqsat etilgen qaýipsizdik normalarynan asyp ketkenin anyqtady. Másele shamamen 19 900 kólikke qatysty. Retteýshiniń málimetinshe, jaryqtyń shamadan tys qarqyndylyǵy júrgizýshi men jol qozǵalysynyń basqa qatysýshylarynyń kórinýin tómendetip, apat qaýpin arttyrady.
Óndirýshi bul máseleni 2024 jyldyń kókteminde nemese odan da erte bilgen. Sol kezde Tesla kompanıasy retteýshige avtokólik ıeleriniń shaǵymdarynyń joqtyǵyn alǵa tartyp, aýytqýdy «qaýipsizdik úshin eleýsiz» dep tanýdy surap, petısıa jibergen. Keıbir jaǵdaılarda faralardyń jaryqtyǵy zańmen ruqsat etilgen normadan eki ese derlik asyp ketken.
Alaıda 17 shildede NHTSA avtóndirýshiniń petısıasyn resmı túrde qabyldamady. Vedomstvo táýekelderdi baǵalaý kezinde adamdarǵa tónetin áleýetti qaýip eskeriletinin, al shaǵymdardyń bolmaýy buzýshylyqtardy elemeýge negiz bolmaıtynyn atap ótti.