AQSH-tyń Tehas shtatynda balyqshy Sebastán Benıtes Trınıtı ózeninen erekshe balyq — ejelgi shortan túrleriniń sırek gıbrıdin aýlady. Ǵalymdardyń baǵalaýynsha, bul balyqtardyń evolúsıalyq jelileri dınozavrlar dáýirinde, shamamen 100 mln jyl buryn bólingen, dep habarlaıdy infohub.kz saıty.
Benıtes Trınıtı ózeninde balyq aýlaǵan, onda buryn da iri oljalarǵa kezikken. Alaıda bul joly ol sırek gıbrıdti — alıgator shortanynyń urǵashysy men uzyn tumsyqty shortannyń erkegin ustady.
Eki túr de balyqtardyń eń ejelgi evolúsıalyq jelileriniń birine jatady jáne adamdardan da, tipti dınozavrlardan da buryn paıda bolǵan. Olardyń ortaq ata-tegi shamamen 100 mln jyl buryn ómir súrgen, sondyqtan aýlanǵan gıbrıd osy ejelgi jeliniń ókili sanalady. Mundaı balyqtardyń býdandasýy óte sırek kezdesedi jáne popýlásıanyń shamamen 1–2%-yn ǵana quraıdy.
Erekshe balyqty basy men aýzynyń pishininen tanýǵa bolady. Alıgator shortanynyń basy qysqa ári jalpaq, al uzyn tumsyqty shortannyń aty aıtyp turǵandaı, uzyn ári tar. Gıbrıdtiń aýzy eki túrdiń de belgilerin biriktirgen sozylyńqy úshburyshty bolyp shyqqan.
Aıtpaqshy, bul ejelgi balyqtardyń taǵy bir ereksheligi bar. Olarda omyrtqalylar arasynda eń tómen genetıkalyq mýtasıa deńgeıi anyqtalǵan. Ǵalymdar muny DNQ-ny qalpyna keltirýdiń tıimdi júıesimen baılanystyrady jáne ony zertteý qaterli isik aýrýyn zertteýge kómektesedi dep esepteıdi.
Buǵan deıin Kursiv LifeStyle Antarktıdada shamamen 55 mln jyldyq jyrtqysh sútqorektiniń tasqa aınalǵan izin tapqanyn jazǵan. Moneta mólsherindeı iz Kıng-Djordj aralyndaǵy výlkandyq balshyqta saqtalǵan.