Kaspı teńiziniń jaǵalaýynda Tótenshe jaǵdaılar mınıstrligi qyzmetkerleri men olardyń otbasylaryna arnalǵan «112 Resort Aktau» demalys ortalyǵy jumysyn bastady. Bul Qazaqstandaǵy alǵashqy vedimistik kýrort, dep habarlaıdy infohub.kz saıty.
Joba aıasynda 45 zamanaýı kapsýlalyq úı ornatý josparlanǵan. Onyń jeteýi qonystanýǵa tolyq daıyn: olar otbasylyq demalysqa eseptelgen jáne barlyq qajetti turmystyq tehnıkamen jabdyqtalǵan.
Ortalyq aýmaǵynda ótkizý pýnkti, ákimshilik ǵımarat, meıramhana, balalar oıyn alańy, eki sýburqaq, teńiz sýy úzdiksiz aınalyp turatyn baseın, ashyq dýsh, pırs, barbekú aımaǵy, dámhana jáne avtokólik turaǵy jabdyqtalǵan.
«Aýmaq abattandyrylǵan: asfált joldar men jaıaý júrginshiler joldary salynyp, syrtqy jaryqtandyrý ornatylyp, kógaldandyrý jumystary júrgizilip, aǵashtar otyrǵyzyldy. Demalys ortalyǵy qajetti ınjenerlik-kommýnıkasıalyq ınfraqurylymmen tolyq qamtamasyz etilgen», — dep atap ótti TJM.
Demalýshylardyń qaýipsizdigin qamtamasyz etý úshin Mańǵystaý oblysy TJ departamentiniń jedel-qutqarý jasaǵy men apattar medısınasy ortalyǵynyń qyzmetkerlerine arnalǵan jeke úı salynǵan. Olar táýlik boıy kezekshilik atqarady.
Ortalyqtyń alǵashqy qonaqtary kýrort aımaǵyn salý men abattandyrýǵa qatysqan qutqarýshylar, órt sóndirýshiler jáne olardyń otbasy músheleri bolady.