Kreatıvti ekonomıka kúnderi aıasynda TMD-da úzdik dızaınerler men tiginshiler tańdalady. Bul shara 2026 jyldyń 28–30 qazany aralyǵynda ótedi. Halyqaralyq syılyq búkil Dostastyqtaǵy sán jáne jeńil ónerkásip mamandaryn biriktiredi, dep habarlaıdy infohub.kz saıty.
«Kreatıvti ekonomıka kúnderi 2026 jyldyń 28–30 qazanynda ótip, TMD elderiniń sán, jeńil ónerkásip jáne kreatıvti ekonomıka ókilderi úshin kásibı qarym-qatynastyń jańa alańyna aınalady», — delingen TMD Atqarýshy komıteti habarlamasynda.
Bul is-shara «Sán dostastyǵy» halyqaralyq forýmynyń jalǵasy bolady. Ol jetekshi dızaınerlerdi, óndirýshilerdi, kásipkerlerdi, bilim berý uıymdarynyń, memlekettik organdardyń jáne damý ınstıtýttarynyń ókilderin biriktiredi.
«Baǵdarlamanyń basty oqıǵalarynyń biri — arnaıy syılyqty tabystaý. Onyń laýreattary dızaınerler, jeńil ónerkásip kásiporyndarynyń basshylary, oqytýshylar, bilim berý uıymdarynyń qyzmetkerleri jáne kıim, aıaq kıim, aksesýarlar jasap, zamanaýı kreatıvti ındýstrıalardy damytyp júrgen stýdentter bola alady», — dep málimdedi TMD Atqarýshy komıtetinde.
Ótinimder qabyldaý bastaldy. Qujattardy «Sán dostastyǵy» jobasynyń resmı saıty arqyly 2026 jyldyń 30 qyrkúıegine deıin tapsyrýǵa bolady. Baıqaý irikteýi 2026 jyldyń 20 shildesi men 5 qazany aralyǵynda ótedi, sodan keıin sarapshylar qazylar alqasy jeńimpazdardy anyqtaıdy. Qatysý úshin jobanyń resmı saıtynda ótinimdi toltyrý qajet.
Jeńimpazdar alty negizgi nomınasıa boıynsha anyqtalady: «Inovasıalyq óndiris», «Jyl dızaıneri», «Jeńil ónerkásip jáne sán ındýstrıasy salasyndaǵy aǵartýshylyq joba», «Salaýatty sán salasyndaǵy joba», «Jeńil ónerkásip salasyndaǵy úzdik jumys berýshi», «Úzdik stýdenttik joba». Sonymen qatar, eki arnaıy nomınasıa qarastyrylǵan — «Halyqaralyq yntymaqtastyqty damytýǵa qosqan úlesi úshin» jáne «Jeńil ónerkásip pen kreatıvti ındýstrıalardaǵy úzdik áleýmettik joba úshin».
«Ár sanat úshin ózindik baǵalaý krıterıleri ázirlengen. Máselen, «Jyl dızaıneri» nomınasıasy boıynsha jeńimpazdy anyqtaý kezinde qazylar alqasy koleksıanyń ereksheligi men kórkemdik qundylyǵyn, dızaınerlik sheshimderdiń ózektiligin, naryqtyń zamanaýı úrdisterine sáıkestigin, buıymdardyń oryndalý sapasyn jáne bólshekterdiń pysyqtalý deńgeıin eskeredi», — dep atap ótti baıqaýdy uıymdastyrýshylar.
Syılyqtyń basty maqsaty — sán jáne jeńil ónerkásip ındýstrıasynyń bolashaǵyn qalyptastyratyn, ınovasıalyq tásilderdi engizetin, suranysqa ıe ónimderdi jasaıtyn jáne TMD keńistiginde kreatıvti ekonomıkanyń damýyna yqpal etetin mamandardy qoldaý ekeni aıtyldy.
Uıymdastyrýshylar jas talanttarǵa erekshe kóńil bólmek. Syılyq olardyń shyǵarmashylyq áleýetin ashýǵa, kásibı ósý múmkindikterin keńeıtýge, zamanaýı dızaındy tanymal etýge, sondaı-aq ártúrli el ókilderi arasyndaǵy yntymaqtastyqty nyǵaıtýǵa kómektesedi dep kútilýde.
Kreatıvti ekonomıka kúnderi bıznes, memlekettik organdar, bilim berý mekemeleri, damý ınstıtýttary jáne kásibı qoǵamdastyq ókilderin biriktiredi. Bul alań kreatıvti ındýstrıalardyń damý bolashaǵyn talqylaýǵa, úzdik tájirıbelermen almasýǵa jáne sán, dızaın jáne jeńil ónerkásip salasyndaǵy jańa birlesken jobalardy júzege asyrýǵa arnalady.
Qatysýshylardy tirkeý 2026 jyldyń 23 qazanyna deıin TMD Atqarýshy komıtetiniń saıtyndaǵy silteme boıynsha jalǵasady.