Togo bıligi eki fransýz derekti fılm túsirýshisi men olardyń jergilikti kómekshisin úsh aptadan astam ýaqyt boıy ustap, keıin tergeý ızolátoryna japty. Bul týraly «Shekarasyz jýrnalıser» uıymy habarlady. Oqıǵa fransýz buqaralyq aqparat quraldary men Togo úkimeti arasyndaǵy shıelenis aıasynda oryn alyp otyr, dep habarlaıdy infohub.kz saıty.
«Shekarasyz jýrnalıser» uıymynyń málimetinshe, rejıserler Gael Mokaer men Sebastán Peres Pessanı, sondaı-aq olardyń kómekshisi Fred Vedomeı ımıgrasıalyq rásimder kezinde «jalǵan málimdemeler» jasady degen aıyppen dúısenbide tergeý ızolátoryna qamalǵan. Parıjde ornalasqan medıa-qor olardy dereý bosatýdy talap etti.
Mokaer men Pessanı fransýz qoǵamdyq telearnasynyń derekti fılmder sıkliniń bir bóligin túsirip jatqan bolatyn. 27 shildede Togonyń soltústigindegi Kara qalasynda polısıa úsheýin tutqyndady. Sońǵy jyldary Togonyń soltústiginde «Ál-Qaıda» men «Islam memleketi» toptaryna qatysty qarýly toptardyń shabýyldary jıilep ketken.
Bul qamaýlar Togonyń Reseıge, sondaı-aq Malı, Býrkına-Faso jáne Nıgerge jaqyndaı túsken kezeńde oryn alyp otyr. Atalǵan úsh elde áskerı bılik bılikke kelgennen keıin fransýz áskerlerin qýyp shyǵyp, Máskeýmen baılanysty nyǵaıtqan edi. Reseı men Togo byltyr áskerı yntymaqtastyq týraly kelisimge qol qoıyp, birlesken jattyǵýlar men áskerı daıyndyqty kózdegen.
Togo bıligi fransýz buqaralyq aqparat quraldaryna da shekteý qoıyp otyr. 2025 jyldyń maýsymynda bılik fransýz halyqaralyq arnalary Radio France Internationale men France 24 taratýyn úsh aıǵa toqtatqan. Olardy kóshbasshy For Gnassıngbege qarsy narazylyqtardy jarıalaý kezinde dálsiz jáne birjaqty aqparat taratty dep aıyptaǵan.
«Shekarasyz jýrnalıser» uıymy aıyptalýshylardyń jumys vızasyna ótinish berip, Togonyń Týrızm, mádenıet jáne óner mınıstrliginen ruqsat alǵanyn málimdedi. Alaıda Mádenıet mınıstri Isaak Chıakpe bul málimdemeni joqqa shyǵardy. Onyń aıtýynsha, eger olarda tıisti ruqsat bolsa, qamaýǵa alynbas edi. Togonyń medıa-retteýshisi HARC tarapynan da túsirýshilerden nemese France Télévisions-ten akredıtasıa ótinimi túspegenin, soltústikte túsirilim júrgizilip jatqany týraly habarlanbaǵanyn málimdedi.
«Shekarasyz jýrnalıser» uıymy sot prosesin «negizsiz» jáne «shamadan tys» dep atap, Pessanıdiń densaýlyǵyna baılanysty dereý medısınalyq kómek qajet ekenin jetkizdi. Polısıa túsirýshilerdiń jabdyqtaryn tárkilep, úsheýin 30 shildede qysqa ýaqytqa bosatyp, keıin qaıta tutqyndap, astana Lomege jetkizgen.