Qyzylorda oblysynda polısıa jol qozǵalysy erejelerin óreskel buzǵan toı sherýine qatysýshylardy anyqtady. 15 adam jaýapkershilikke tartyldy, dep habarlaıdy infohub.kz.
QR İİM «Novostı İİM RK» Telegram-arnasynda habarlanǵandaı, sherýge qatysýshylar qarsy baǵytqa shyǵyp, jolda avarıalyq jaǵdaı týǵyzyp, pırotehnıka qoldanǵan. Oqıǵa 23 tamyzǵa qaraǵan túni Jańaqorǵan aýdanynda bolǵan. Kólikterdiń birinde «Bratva jenıha» degen jazý bolǵan.
«Barlyq qatysýshylar anyqtalyp, polısıaǵa jetkizildi. Olardyń 21 ben 35 jas aralyǵyndaǵy 15 adam — Jańaqorǵan aýdany, Almaty jáne Jambyl oblystary, sondaı-aq Shymkent turǵyndary ekeni anyqtaldy. Jaýapkershilikke tartylǵandardyń ishinde 13 júrgizýshi jáne eki jolaýshy bar», — dedi vedomstvoda.
Quqyqbuzýshylarǵa qatysty 56 ákimshilik is qozǵaldy. Olar qarsy baǵytqa shyqqany, avarıalyq jaǵdaı týǵyzǵany, qaýipti manevr jasaǵany, júrgizýshi kýáliginsiz jáne tehnıkalyq aqaýy bar kólikti basqarǵany, usaq buzaqylyq jasaǵany, sondaı-aq eldi mekende pırotehnıkany zańsyz qoldanǵany úshin jaýapkershilikke tartyldy.
Sot sheshimimen úsh júrgizýshi kólik quralyn basqarý quqyǵynan aıyryldy. Qatysýshylardyń biri bes táýlikke qamaqqa alyndy. Qalǵandaryna ákimshilik jaza qoldanyldy. Bes kólik arnaıy turaqqa qoıyldy. Barlyq qatysýshyǵa mundaı áreketterdiń jol berilmeıtindigi týraly resmı eskertý jasaldy.
«Merekelik shara eshkimge jol qozǵalysynyń basqa qatysýshylaryn qaýipke tigýge quqyq bermeıdi. Toı sherýleriniń jolda eshqandaı artyqshylyǵy joq. Zańdy óreskel jáne ádeıi buzǵan árbir kináli tıisti jaýapkershilikke tartylady», — dedi İİM ókilderi.