Qazaqstan Prezıdenti Qasym-Jomart Toqaev Qorǵanys mınıstrligin túbegeıli qaıta qurý qajettigin málimdedi. Qaýipsizdik keńesiniń apparaty vedomstvonymen birlesip, on kúndik merzimde áskerı reforma josparyn usynýy tıis, dep habarlaıdy infohub.kz saıty.

«Qaýipsizdik keńesiniń apparatymen ótken jınalysta áskerı saladaǵy jumystyń basym baǵyttaryn aıqyndadym. Bizdiń armıa ótken ǵasyrda qatyp qalǵan. Sonymen qatar, ozyq halyqaralyq tájirıbege sáıkes qolbasshylyq júıesin tolyq qaıta qurý qajet. Keshendi kózqaras kerek, ol úshin kóregendik qajet, al kóregendik tek keń oı-órisi bar saýatty ofıserlerde ǵana bolady. Reformanyń maqsaty – jańa úlgidegi armıa qalyptastyrý», – dep atap ótti Toqaev.

Memleket basshysy armıany sıfrlyq transformasıaǵa kóshirýdi jáne múmkin bolǵan jerde adamnyń ornyna tehnologıalardy qoldanýdy tapsyrdy.

«Armıany damytýǵa jańa kózqarastar qajet. Qalypty sheshimder, «kórsetilim» manevrler, ádemi esepter eshkimge kerek emes», – dedi prezıdent.

Qorǵanys mınıstriniń aldyna qandaı mindetter qoıyldy

Birinshi mindet – búdjet qarajatyn paıdalaný tıimdiligin túbegeıli arttyrý.

«Bólinetin barlyq qarajat memlekettiń qorǵanys qabiletin qamtamasyz etýge barynsha nátıje berýi tıis. Maqsatsyz shyǵyndar, ásirese urlyqqa jol berilmeıdi. Mundaı áreketter úshin jaýapkershilikten eshkim qutylmaıdy», – dedi Toqaev.

Ekinshi mindet – Qarýly kúshterdi zamanaýı qaýip-qaterlerdi eskere otyryp reformalaý. Kadrlardy baǵalaý jáne irikteý úshin prezıdent ashyq krıterıler engizýdi usyndy.

«Qolbasshylyq laýazymdarǵa jeke adaldyq prınsıpi boıynsha emes, tek tájirıbe men quzyrettilik negizinde usynylýy kerek», – dedi ol.

Úshinshi mindet – áskerı qyzmetshiler arasynda Konstıtýsıa qundylyqtary, áskerı is tarıhy, qazaq jáne álem mádenıetiniń jetistikteri negizinde ıdeologıalyq jáne tárbıe jumysyn kúsheıtý. Prezıdenttiń aıtýynsha, armıa kásibı daıarlyq mektebi jáne bilim men patrıotızmniń qaınar kózi bolýy tıis, al árbir áskerı qyzmetshiniń ómiri men qaýipsizdigi – sózsiz basymdyq.

«Otandy qorǵaý – árbir azamattyń qasıetti boryshy. Óz ómirin áskerı qyzmetke arnaǵandar memlekettiń qamqorlyǵy men qoldaýyna laıyq. Armıada qyzmet etý qorqynysh pen úreı týǵyzbaýy kerek, armıa ótken men qazirginiń úzdik úlgilerimen jas jaýyngerlerdi, Otanynyń shynaıy patrıottaryn tárbıeleıtin ınstıtýt bolýǵa tıis», – dedi memleket basshysy.

Toqaev sondaı-aq áskerı qyzmetshilerdiń, ásirese qolbasshylyqtyń joǵary baǵasy men marapattaýyna ıe bolǵandardyń qyzmetin obektıvti jarıa etýge shaqyrdy.

Prezıdent kólemdi tujyrymdamalar men jol kartalaryn emes, naqty kezeń-kezeńimen reforma josparyn kútetinin atap ótti. Qujat qazan aıynyń ekinshi jartysynda Qaýipsizdik keńesiniń otyrysynda qaralady. Armıany reformalaýdy Qaýipsizdik keńesiniń apparaty úılestiredi.