Qazaqstan Prezıdenti Qasym-Jomart Toqaev BRIKS samıti aıasynda AQSh Prezıdentiniń Ońtústik jáne Ortalyq Azıa jónindegi arnaıy ókili Serdjıo Gormen kezdesti. Áńgime basynda amerıkandyq ókil memleket basshysyna Qazaqstan Táýelsizdiginiń 35 jyldyǵy qarsańynda AQSh Prezıdenti Donald Tramptyń jeke quttyqtaý hatyn tapsyrdy, dep habarlaıdy infohub.kz saıty.
Qasym-Jomart Toqaev AQSh Prezıdentine jyly lebizi úshin alǵys aıtyp, amerıkandyq kóshbasshyny Qazaqstanǵa resmı saparmen kelýge shaqyrdy.
Memleket basshysy keńeıtilgen qazaq-amerıkandyq strategıalyq áriptestiktiń qarqyndy damyp kele jatqanyn atap ótip, ózara is-qımyldy odan ári nyǵaıtýdyń erekshe mańyzdylyǵyn atap kórsetti.
«Qazir Máıamıdegi G20 samıtine qatysýǵa daıyndalyp jatyrmyn. Bul ekijaqty kún tártibindegi máselelerdi talqylaýǵa da tamasha múmkindik bolady dep oılaımyn. Biz ózara yntymaqtastyǵymyzdy ilgeriletý úshin ádemi sózderdi emes, naqty ister men praktıkalyq qadamdardy qalaımyz», – dedi Qazaqstan Prezıdenti.
Serdjıo Gor óz kezeginde Qazaqstan men AQSh kóshbasshylary arasyndaǵy tyǵyz jáne senimdi baılanystardyń arqasynda ekijaqty qatynastar buryn-sońdy bolmaǵan joǵary deńgeıge jetkenin atap ótti.
«Búginde elderimiz arasyndaǵy saýda-ekonomıkalyq baılanystar men ózara is-qımyl belsendi damyp keledi. Bizdiń Prezıdentimiz Qazaqstanmen jáne Ortalyq Azıamen áriptestikti nyǵaıtýǵa úlken kóńil bóledi», – dedi arnaıy ókil.
Kezdesý barysynda jasandy ıntellekt pen sıfrlandyrý sıaqty basym salalarǵa basa nazar aýdara otyryp, birlesken jumystyń birqatar mańyzdy baǵyttary da qarastyryldy.
Sońynda áńgimelesýshiler kópqyrly áriptestikti odan ári keńeıtýge jáne ózara tıimdi yntymaqtastyqqa qosymsha serpin berýge umtylatyndaryn rastady.
Buǵan deıin «Kýrsıv» Toqaevtyń XVIII BRIKS samıti aıasynda Abý-Dabı murager hanzadasy sheıh Haled ben Muhammed ben Zaıd ál-Nahaıanmen kezdeskenin jazǵan bolatyn.