2025 jyly zorlyq-zombylyqtan álem ekonomıkasyna kelgen shyǵyn shamamen 22 trıllıon dollardy qurady. Bul — jahandyq JİÓ-niń 10 paıyzy. Osyndaı baǵany Qazaqstan Prezıdenti Qasym-Jomart Toqaev Nú-Delıde ótken «BRIKS plús» samıtiniń plenarlyq otyrysynda aıtty, dep habarlaıdy Aqorda, infohub.kz saıtyna silteme jasap.
«Aýtrıch» / «BRIKS plús» formatyndaǵy otyrys turaqtylyqty nyǵaıtýǵa, ınovasıalarǵa, yntymaqtastyqqa jáne turaqtylyqqa arnaldy. Memleket basshysy Úndistan Premer-mınıstri Narendra Modıge qonaqjaılyǵy men kezdesýdi uıymdastyrǵany úshin alǵys aıtty.
«Bizdiń kezdesýimiz Úndistannyń biregeı baı mádenı murasyn beıneleıtin Nú-Delıde ótip jatqany sımvoldyq mánge ıe. BRIKS aıasyndaǵy yntymaqtastyqtyń 20 jyldyǵy qarsańynda Úndistannyń tóraǵalyǵy halyq múddesine baǵyttalǵan jáne „Adamzat bárinen bıik“ qaǵıdatyna negizdelgen ózekti kún tártibine erekshe serpin berdi», — dedi Qazaqstan Prezıdenti.
Onyń aıtýynsha, BRIKS elderi planeta halqynyń jartysyna jýyǵyn quraıdy jáne álemdik JİÓ-niń 40 paıyzyn qamtamasyz etedi. Bul birlestikke zor múmkindikter berip otyr, sonymen qatar alshaqtyqty eńserý jáne naqty nátıjelerge qol jetkizý úshin oǵan jaýapkershilik júkteıdi.
Toqaev bul áleýetti tolyq iske asyrý álemdik qoǵamdastyqtyń irgeli máselelerin sheshpeı jáne jetekshi derjavalar arasyndaǵy senimdi qalpyna keltirmeı múmkin emes ekenin atap ótti.
Prezıdent 2026 jylǵy Jahandyq beıbitshilik ındeksine silteme jasady. Onyń avtorlary «Uly fragmentasıa» uǵymyn qoldanady. Ol geosaıası qaqtyǵys, mılıtarızasıanyń kúsheıýi, kópjaqty ınstıtýttardyń álsireýi jáne saýda kedergileriniń ósýi kezeńin sıpattaıdy.
«Aımaqtyq qaqtyǵystar tikeleı qarsylasý aımaqtarynan áldeqaıda asyp, álem ekonomıkasyna eleýli áser etip jatqanyn kórip otyrmyz. Mańyzdy teńiz marshrýttarynyń buzylýy jahandyq energetıkalyq, azyq-túlik jáne saýda tizbekteriniń osaldyǵyn anyqtady», — dedi Toqaev.