BRIKS samıtinde Qazaqstan Prezıdenti Qasym-Jomart Toqaev jasandy ıntellekt pen sý resýrstary salasynda bastamalar kóterip, eldiń kópjaqty yntymaqtastyq alańyna aınalýǵa daıyn ekenin málimdedi, dep habarlaıdy infohub.kz saıty.
Memleket basshysy jasandy ıntellekt qazirdiń ózinde ekonomıkalardy, qoǵamdardy jáne álemdik kúshter tepe-teńdigin ózgertip jatqanyn atap ótti. Onyń aıtýynsha, jetekshi damýshy ekonomıkalardyń tehnologıalyq múmkindikterin olardyń aýqymymen ushtastyrsa, BRIKS ınovasıalar, ınvestısıalar jáne turaqty ósý úshin jańa múmkindikter asha alady.
Qasym-Jomart Toqaev Qazaqstan jasandy ıntellektini strategıalyq basymdyq retinde qarastyratynyn jáne BRIKS plús formatynda tıimdi ózara is-qımyldy keńeıtý úshin óziniń damyǵan esepteý ınfraqurylymyn, sondaı-aq BUU-nyń ulttyq jáne sıfrlyq ortalyqtaryn paıdalanýǵa daıyn ekenin atap ótti.
«Naqty qadam retinde ulttyq JI ortalyqtaryn biriktirý, zerthanalar men ǵylymı jobalarǵa qoljetimdilik berý, sondaı-aq kóptildi sheshimder ázirleý úshin jasandy ıntellekt salasynda BRIKS plús seriktestigin iske qosýdy usynamyn», — dedi prezıdent.
Qazaqstan Prezıdenti turaqtylyq tek tehnologıalyq progresti ǵana talap etpeıtinine de nazar aýdardy. Ol barlyǵy úshin prınsıpti mańyzy bar sý resýrstary máselesin qozǵady. Jahandyq aýqymda sý resýrstaryn basqarý áli de bytyrańqy kúıde qalyp otyr.
«Osyǵan baılanysty biz jahandyq kúsh-jigerdiń kelisimdiligin arttyryp, memleketaralyq úılestirýdi nyǵaıtý úshin BUU-nyń mamandandyrylǵan mekemesi retinde Halyqaralyq sý uıymyn qurýdy usyndyq. BRIKS-ke múshe memleketter men seriktesterdi elimiz bastamashylyq etken halyqaralyq konsýltasıalarǵa qosylýǵa shaqyramyn», — dedi memleket basshysy.
Sózin qorytyndylaı kele, Qazaqstan Prezıdenti tıimdi kópjaqtylyqsyz kóppolárlyq «Uly fragmentasıany» adamzat úshin odan ári qaýipti etetinin málimdedi. Onyń pikirinshe, sondyqtan Qazaqstan egemendik teńdikke, múddeler tepe-teńdigine jáne ortaq jaýapkershilikke negizdelgen kóppolárlyqty jaqtaıdy.
Qasym-Jomart Toqaev Nú-Delıdegi samıt osy kózqarasty praktıkalyq yntymaqtastyq pen birlesken ilgerileý arqyly ilgeriletýge yqpal etetinine senim bildirdi.