Qazaqstan Prezıdenti Qasym-Jomart Toqaev Germanıaǵa sapary barysynda nemis temirjol konserni Deutsche Bahn (DB) basshylyǵymen kelissóz júrgizdi. Kezdesýde Qazaqstan temir jolyn jańǵyrtý, otandyq ónimdi Germanıa Federatıvtik Respýblıkasyna jetkizý jáne Orta dálizdi (Transkaspı halyqaralyq kólik baǵyty, THKB) keńeıtý máseleleri basty nazarda boldy, dep habarlaıdy infohub.kz saıty.
Memleket basshysy Deutsche Bahn kompanıasynyń respýblıkanyń kólik salasyn transformasıalaýǵa qosqan úlesine joǵary baǵa berdi. Atap aıtqanda, DB Engineering & Consulting pen «QTJ» UK» AQ-nyń Qazaqstandaǵy jolaýshylar tasymalynyń sapasy men tıimdiligin arttyrýǵa baǵyttalǵan birlesken jobasy týraly sóz boldy.
Sonymen qatar prezıdent qazaqstandyq óndirýshilerdiń nemis alybynyń jahandyq jetkizý tizbegine kirigýiniń mańyzdylyǵyn atap ótti. Ol úshin otandyq kásiporyndar Germanıa Federatıvtik Respýblıkasynyń standarttary boıynsha tıisti sertıfıkattaýdan ótýi qajet.
Deutsche Bahn AG satyp alý jónindegi dırektory Ian Grote Qasym-Jomart Toqaevqa kompanıanyń Qazaqstandaǵy jumysyna bergen joǵary baǵasy úshin alǵys aıtyp, seriktestikti keńeıtýge daıyn ekenin rastady.
Kezdesýde DB Cargo Eurasia GmbH basshysy Andreas Lúbstyń qatysýymen júk baǵytyna jeke kóńil bólindi. Qazaqstan men DB Cargo Eurasia konteınerlik tasymal kólemin odan ári ulǵaıta beredi, bul rette Azıa men Eýropany jalǵaıtyn basty býynǵa aınalǵan Transkaspı halyqaralyq kólik baǵytyna (THKB / Orta dáliz) basty nazar aýdarylady.
Kelissóz sońynda taraptar logıstıkalyq keshenniń barlyq spektri boıynsha uzaq merzimdi jáne júıeli yntymaqtastyqty damytý nıetin rastady.