Qazaqstan Prezıdenti Qasym-Jomart Toqaevtyń Germanıaǵa resmı sapary eldiń ekonomıkalyq qaýymdastyqtary men qarjy ınstıtýttarynyń basshylarymen kezdesýden bastaldy, dep habarlaıdy infohub.kz saıty.
Prezıdenttiń baspasóz qyzmeti málimdegendeı, Qasym-Jomart Toqaev kezdesýge qatysýshylarmen germandyq qarjyny, saraptamalyq tájirıbeni jáne táýekelderdi basqarý quraldaryn Qazaqstannyń resýrstary men kólik áleýetimen biriktirý perspektıvalaryn talqylady.
Memleket basshysy elimizdiń Germanıanyń Ortalyq Azıadaǵy jáne Eýrazıa keńistigindegi senimdi seriktesi bolýǵa umtylatynyn málimdedi.
«Germanıa meniń halqymnyń tereń qurmetine bólengenin jáne Qazaqstanda óte joǵary bedelge ıe ekenin atap ótkim keledi. Sizderdiń bank sektoryńyzdyń tártibi, ınjenerlik sheshimderdiń joǵary sapasy, sondaı-aq shaǵyn jáne orta bıznestiń (Mittelstand) turaqtylyǵy — biz jańǵyrtý men tehnologıalyq transformasıa barysynda ekonomıkamyzǵa engizýge umtylatyn dál sol qasıetter. Germanıa Federatıvtik Respýblıkasy — Eýropadaǵy negizgi seriktesterimizdiń biri. Qazaq-german yntymaqtastyǵy Qazaqstannyń eń iri saýda jáne ınvestısıalyq seriktesi — Eýropalyq odaqpen ózara is-qımylynyń ajyramas bóligi. Biz birge úlken joldan óttik, biraq ekonomıkalyq seriktestigimizdiń áleýeti áli de tolyq paıdalanylǵan joq. Qazaqstan ony sapaly jańa deńgeıge shyǵarýǵa daıyn», — dedi prezıdent.
Osylaısha, Qasym-Jomart Toqaev qazaqstan-german ınvestısıalyq-qarjy platformasyn qurýdy usyndy.
«Mundaı platforma germandyq jáne eýropalyq kapıtaldy qazaqstandyq qarjylandyrýmen, kepildiktermen jáne táýekelderdi bólý tetikterimen biriktirýge múmkindik beredi, al «Báıterek» holdıńi jobalardy qurylymdaýdy qamtamasyz etedi. Biz elimizde jumys istep jatqan halyqaralyq qarjy uıymdarymen qatar germandyq eksporttyq kredıtteý jáne ınvestısıalardy saqtandyrý ınstıtýttarynyń qatysýyn quptaımyz. Osy turǵyda Qazaqstanda qyzmetin júzege asyryp jatqan Euler Hermes kompanıasymen yntymaqtastyqqa beretin mańyzymyzdy erekshe atap ótken jón», — dep túsindirdi Qazaqstan prezıdenti.
Sózinde taǵy bir basymdyq retinde sıfrlyq ınovasıalar men jasandy ıntellekt salasyndaǵy qazaq-german seriktestigin qurý ataldy.
«Biz germandyq kompanıalardy derekterdi óńdeý ortalyqtaryna arnalǵan tehnologıalar, energıa tıimdiligi, bulttyq ınfraqurylym jáne kıberqaýipsizdik sıaqty salalarda óz áleýetin paıdalanýǵa shaqyramyz. Taǵy bir perspektıvaly baǵyt — fınteh. Qazaqstannyń sıfrlyq qarjy ekojúıesiniń joǵary damý deńgeıi ishki naryqta ozyq tólem sheshimderi men tokenızasıa tehnologıalaryn qurýǵa, keıinnen olardy búkil aımaqqa keńeıtýge múmkindik beredi», — dedi memleket basshysy.
Qasym-Jomart Toqaevtyń pikirinshe, yntymaqtastyqtyń kelesi baǵyty — nemis qarjy sektorynyń Qazaqstan ekonomıkasyna keńirek qatysýy úshin «qaqpa» bolýǵa tıis Alatau City damytý.
«Bul joba — Ortalyq Azıadaǵy sıfrlyq dáýirdiń barlyq talaptaryn eskere otyryp jobalanǵan alǵashqy «aqyldy qala». Ol nemis ınstıtýsıonaldyq kapıtaly men Qazaqstannyń ınvestısıalyq múmkindikteri arasyndaǵy praktıkalyq baılanystyrýshy býynǵa aınala alady. Alatau City búkil Eýrazıada talanttar, tehnologıalar men bıznestiń jańa tartylys ortalyǵyna aınalatynyna senimdimin», — dep esepteıdi prezıdent.
Qorytyndylaı kele, Qasym-Jomart Toqaev Qazaqstan men Germanıa saıası dıalogtyń joǵary deńgeıine súıene otyryp, tyǵyz qarjylyq, tehnologıalyq jáne ınvestısıalyq seriktestik qurý úshin barlyq qajetti múmkindikterge ıe ekenin atap ótti. Basty maqsat — kapıtal aǵynyn jaı ǵana ulǵaıtý emes, birlesip jańa salalar men uzaq merzimdi ósý núktelerin qurý.