Qazaqstan Prezıdenti Qasym-Jomart Toqaev Germanıa kansleri Frıdrıh Merspen kelissóz júrgizdi. Taraptar ekijaqty yntymaqtastyqty talqylap, ózara is-qımyldy jandandyrýǵa ýaǵdalasty, dep habarlaıdy infohub.kz saıty.
Memleket basshysy jyly qabyldaǵany úshin alǵys aıtty. Taraptar Qazaqstan men Germanıa arasyndaǵy kópqyrly yntymaqtastyqty nyǵaıtýǵa berik beıildilikterin rastap, eki el úkimetteri ózara is-qımyldy keńeıtýge jaǵdaı jasaý jolynda jumys isteıtinin atap ótti.
Qazaqstan Prezıdenti atap ótkendeı, Germanıa respýblıkanyń negizgi saýda seriktesteriniń jáne jetekshi sheteldik ınvestorlarynyń qatarynda. Ónerkásip, asa mańyzdy mıneraldar, kólik jáne logıstıka, sıfrlyq tehnologıalar, sondaı-aq mashına jasaý men hımıa ónerkásibin qosa alǵanda, qosylǵan quny joǵary ónim shyǵarý sıaqty salalarda ózara is-qımyldy odan ári keńeıtýdiń aıtarlyqtaı áleýeti bar.
Sonymen qatar kópjaqty yntymaqtastyq máseleleri boıynsha jan-jaqty pikir almasý ótti. Halyqaralyq qurylymdar, onyń ishinde «Ortalyq Azıa — Germanıa» formaty aıasynda ózara is-qımyldy jandandyrýǵa ýaǵdalastyqqa qol jetkizildi.
Odan ári prezıdent pen kansler eki el delegasıalarynyń músheleri qatysqan kelissózderdi jalǵastyrdy. Memleket basshysy Qazaqstan men Germanıanyń strategıalyq seriktestigi berik saıası senimge, ózara ekonomıkalyq múddelerge jáne tyǵyz adamı baılanystarǵa súıenetinin atap ótti.
«Ótken jyly ózara saýda kólemi 4,5 mlrd dollarǵa jetip, 13,4%-ǵa ósti. 21 jyl ishinde Germanıadan kelgen ınvestısıanyń jalpy aǵyny 8 mlrd dollarǵa jetti. Germanıalyq ınvestısıalardyń qaýipsizdigin qamtamasyz etý bizdiń erekshe baqylaýymyzda ekenine sendirgim keledi», — dedi Qasym-Jomart Toqaev.
Taraptar saýda-ekonomıkalyq yntymaqtastyqty nyǵaıtýǵa erekshe nazar aýdardy. Atap ótilgendeı, búgingi tańda birlesken ınvestısıalyq portfel jalpy quny shamamen 54 mlrd dollardy quraıtyn 40 ónerkásiptik jobany qamtıdy. Osy oraıda Qazaqstan Prezıdenti Úkimetaralyq jumys toby men Qazaqstan-Germanıa iskerlik keńesiniń jemisti ári úılesimdi jumysyn atap ótti.
Memleket basshysy Germanıanyń qazirgi álemdik saıasat pen ekonomıkadaǵy mańyzdy rólin atap kórsetti. Onyń aıtýynsha, eldiń ónerkásiptik qýaty, ǵylymı mektebi jáne nemis halqynyń jaýapkershilikpen eńbek etý mádenıeti halyqaralyq deńgeıde joǵary bedelge ıe.
Qazaqstan Prezıdenti men Germanıa kansleri bilim jáne ǵylym salasyndaǵy birlesken bastamalardy iske asyrýdy qosa alǵanda, mádenı-gýmanıtarlyq ózara is-qımyldy keńeıtý máselelerin de qarastyrdy. Taraptar Qasym-Jomart Toqaevtyń Germanıaǵa resmı saparynyń qorytyndylary eki eldiń ıgiligi men gúldenýi jolynda odan da zor nátıjelerge qol jetkizýge yqpal etetinine senim bildirdi.
Kelissózder qorytyndysy boıynsha Memleket basshysy kansler Frıdrıh Mersti Qazaqstanǵa memlekettik saparmen kelýge shaqyrdy.