Qazaqstan Prezıdenti Qasym-Jomart Toqaev Germanıada buqaralyq aqparat quraldaryna bergen brıfıńi barysynda osy elmen jańa strategıalyq kelisimderge qol jetkizilgenin málimdedi, dep habarlaıdy infohub.kz saıty.
Dıplomatıalyq qatynastardyń ornaǵanyna 35 jyl tolatyn qarsańda jýrnalıserdiń Qazaqstan men Germanıa arasyndaǵy yntymaqtastyqtyń sıpaty týraly suraǵyna jaýap bergen Memleket basshysy ekijaqty baılanystar múlde jańa deńgeıge kóterilip jatqanyn atap ótti.
«Biz ótken joldy joǵary baǵalaımyz. Belgili bolǵandaı, júrgen adam joldy baǵyndyrady. Biz aıtarlyqtaı qıyn joldan ótip, úlken tabystarǵa qol jetkizdik. Germanıa, ózderińiz biletindeı, bizdiń elimizde úlken qurmetke ıe. Biz bul eldi jaqsy kóremiz ári qurmetteımiz, onyń jetistikterin, ásirese ekonomıkadaǵy, sondaı-aq basqa da salalardaǵy jetistikterin laıyqty baǵalaımyz. Germanıa — halyqaralyq arenadaǵy abyroıy zor memleket. Sondyqtan men osy elmen jańa kelisimderge qol jetkizý úshin úlken úmitpen, úlken senimmen keldim. Biz bul kelisimderge qol jetkizdik, endi olardy laıyqty júzege asyrý, oryndaý mindeti tur. Sondyqtan bolashaqqa kózqarasym aıtarlyqtaı oń. Biz odan da úlken tabystarǵa jetetinimizge tolyq senimdimin. Kelissózder barysynda Kansler Mersti kelesi jyly ózine qolaıly kez kelgen ýaqytta memlekettik saparmen kútetinimizdi aıttym», – dedi Qazaqstan basshysy.
Buǵan deıin «Kýrsıv» Toqaev Germanıa kansleri Frıdrıh Mersti respýblıkaǵa memlekettik saparmen kelýge shaqyrǵanyn jazǵan bolatyn.
Sonymen qatar Toqaev pen Germanıa prezıdenti Frank-Valter Shtaınmaıer keńeıtilgen quramda kelissózder júrgizgeni habarlanǵan. 2025 jyly eki el arasyndaǵy taýar aınalymy 4,5 mlrd dollarǵa jetti, al sońǵy 20 jylda Qazaqstanǵa quıylǵan nemis ınvestısıasynyń jalpy kólemi 8 mlrd dollardy qurady. Kezdesý qorytyndysy boıynsha prezıdentter birlesken deklarasıa qabyldady, al Shtaınmaıer «Altyn Qyran» ordenimen marapattaldy.