Qazaqstan Prezıdenti Qasym-Jomart Toqaev pen Germanıa Federaldyq prezıdenti Frank-Valter Shtaınmaıer keńeıtilgen quramda kelissóz júrgizdi. Memleket basshysy nemis áriptesine Germanıaǵa shaqyrǵany úshin alǵys aıtyp, joǵary deńgeıdegi baılanystardyń qarqyndylyǵy ekijaqty yntymaqtastyqtyń strategıalyq ári jan-jaqty sıpatyn kórsetetinin atap ótti, dep habarlaıdy infohub.kz saıty.
Qazaqstan Prezıdentiniń aıtýynsha, Germanıa — respýblıkanyń Eýropadaǵy negizgi seriktesi. Eki eldi berik dostyq pen ózara senim baılanystary, sondaı-aq praktıkalyq yntymaqtastyqty damytýdyń zor áleýeti biriktiredi.
«Búginde qarym-qatynasymyz órleý ústinde senimdi damyp, barǵan saıyn keń aýqymdy qamtıdy. Bul oń dınamıkaǵa joǵary deńgeıdegi belsendi saıası dıalog yqpal etýde, ony eki el úkimetteriniń júıeli ózara is-qımyly men isker toptardyń baılanystary nyǵaıtyp otyr. Meniń saparym qarsańynda Berlınde ótken Úkimetaralyq jumys toby men Qazaqstan-Germanıa strategıalyq yntymaqtastyq iskerlik keńesiniń otyrystary ózara tıimdi seriktestikti odan ári keńeıtýge degen ortaq umtylysty rastady», — dedi Qasym-Jomart Toqaev.
Memleket basshysy saýda-ekonomıkalyq jáne ınvestısıalyq yntymaqtastyqtyń qarqyndy damyp kele jatqanyn erekshe atap ótti.
«2025 jyly ekijaqty taýar aınalymy 4,5 mlrd dollarǵa jetti. Bıyl da oń dınamıka saqtalýda. Aǵymdaǵy jyldyń jeti aıynda ózara saýda kólemi 2,6 mlrd dollardan asty. Qazaqstanda búginde nemis kapıtaly qatysatyn 1400-den astam kompanıa tirkelgen. 20 jylda Germanıadan kelgen ınvestısıanyń jalpy aǵyny 8 mlrd dollardy qurady. Ózara is-qımylymyzdyń jarqyn mysaly retinde CLAAS Group, Rhenus Logistics, Siemens Energy, Linde sıaqty jetekshi german kompanıalarymen yntymaqtastyqty ataýǵa bolady», — dep atap ótti Qazaqstan Prezıdenti.
Kelissóz barysynda eki el arasyndaǵy mádenı-gýmanıtarlyq yntymaqtastyqty nyǵaıtý máselelerine jeke nazar aýdaryldy. Atap aıtqanda, memleket basshylary joǵary bilim, medısına jáne mádenıet salalaryndaǵy ózara is-qımyldy keńeıtýge beıildi ekendikterin rastady.