Alatau City-de Koreıanyń ozyq tehnologıalar ýnıversıtetiniń (KAIST) fılıaly ashylady. Qazaqstan Prezıdenti Qasym-Jomart Toqaev bul jobany respýblıkanyń Ońtústik Koreıamen sıfrlandyrý jáne jasandy ıntellekt salasyndaǵy yntymaqtastyǵy úshin serpindi dep baǵalady, dep habarlaıdy Aqorda baspasóz qyzmeti, infohub.kz saıtyna silteme jasap.
Memleket basshysy Qazaqstan men Ońtústik Koreıa sıfrlyq tehnologıalar salasynda birlesken jobalardy iske asyryp jatqanyn atap ótti.
«Koreıa Respýblıkasy – álemdik tehnologıalyq jarystyń kóshbasshylarynyń biri. Qazaqstan da sıfrlyq transformasıanyń belsendi qatysýshysyna aınaldy. Astanada Alem.ai halyqaralyq ortalyǵy ashyldy, sýperkompúterler iske qosyldy, jasandy ıntellektke mamandandyrylǵan ýnıversıtet jumysyn bastady. Koreıamen birqatar birlesken bastamalar júzege asyrylýda. Atap aıtqanda, Túrkistanda Woosong ýnıversıteti ashyldy, Qyzylordada SeoulTech-pen birlesip Jasandy ıntellekt ınstıtýty quryldy. Bizdiń áriptestigimizdiń serpindi jobasy – álemniń jetekshi tehnologıalyq ýnıversıtetteriniń biri KAIST-tiń (Koreıanyń ozyq tehnologıalar ýnıversıteti) Alatau City-de fılıalynyń ashylýy», – dedi memleket basshysy.
Toqaevtyń aıtýynsha, bıyl Koreıanyń ǵylymı-tehnıkalyq aqparat ınstıtýtymen birlesip qurylǵan AI SilkNet predıktıvti analıtıka jáne forsaıt ortalyǵy da jumysyn bastady. Ol osy ortalyqtyń aıasynda eki eldiń ǵylymı mekemeleri, ýnıversıtetteri men tehnologıalyq kompanıalaryn biriktirýdi usyndy.
Prezıdent sondaı-aq Koreıamen birlesip Ortalyq Azıa elderi úshin jasandy ıntellekt salasyndaǵy mamandar daıarlaıtyn AI Talent óńirlik baǵdarlamasyn iske qosýdy mańyzdy dep sanaıdy.
Prezıdenttiń aıtýynsha, bul ekonomıkalyq ósý men ǵylymı progresti yntalandyratyn jańa tehnologıalyq keńistik qalyptastyrýǵa múmkindik beredi.
Jasandy ıntellekt salasyndaǵy yntymaqtastyqtan bólek, taraptar sýtegi energetıkasy men kómir generasıasyn jańǵyrtýdy talqylady.
Buǵan deıin Qazaqstan Prezıdenti Qasym-Jomart Toqaevtyń «Ortalyq Azıa – Koreıa Respýblıkasy» samıtine qatysqany habarlanǵan. Ol jartylaı ótkizgishter óndirý úshin qazaq-koreı kompanıasyn qurýdy usyndy.