Shanhaıda ótken Jasandy ıntellekt jónindegi Dúnıejúzilik konferensıa aıasynda Qazaqstan Prezıdenti Qasym-Jomart Toqaev Kambodja Premer-mınıstri Hýn Manetpen kezdesti. Kezdesý barysynda qazaqstandyq kóshbasshy Kambodjaǵa resmı saparmen barýǵa shaqyrý aldy. Bul týraly infohub.kz habarlaıdy.
Aqordanyń málimetinshe, Qasym-Jomart Toqaev Qazaqstan Kambodjamen yntymaqtastyqty joǵary baǵalaıtynyn, bul seriktestik berik dostyq pen ózara qurmetke negizdelgenin atap ótti. Prezıdent eki el arasyndaǵy saýda-ekonomıkalyq yntymaqtastyqtyń oń serpin alýyna zor áleýet bar ekenin jetkizdi.
Memleket basshysy taýar aınalymyn arttyrýdyń basym baǵyttary retinde aýyl sharýashylyǵy, toqyma ónerkásibi, týrızm, qurylys, tamaq ónerkásibi, kólik jáne logıstıkany atady. Qazaqstan astyq, tyńaıtqyshtar jáne basqa da agrarlyq ónimderdi jetkizýdi ulǵaıtýǵa daıyn.
Sonymen qatar, BUU-nyń elektrondyq úkimetti damytý ındeksi boıynsha 24 kóshbasshynyń qataryna kiretin Qazaqstan ozyq tehnologıalar salasyndaǵy tájirıbesimen bólisýge daıyn.
Kambodja Premer-mınıstri Hýn Manet óz eliniń Qazaqstanmen qarym-qatynasty nyǵaıtýǵa múddeli ekenin rastady. Ol úkimetter men isker toptar arasyndaǵy baılanystardy jandandyrýdyń mańyzdylyǵyn atap ótip, birlesken jobalardy júzege asyrýǵa jan-jaqty qoldaý kórsetýge daıyn ekenin bildirdi.
Áńgimelesý barysynda taraptardyń jahandyq jáne aımaqtyq qurylymdar aıasyndaǵy ózara is-qımyly týraly pikir almasyldy. Qasym-Jomart Toqaev Kambodjaǵa Azıadaǵy ózara is-qımyl jáne senim sharalary jónindegi keńestiń (AÓSSHK) qyzmetin qoldaǵany úshin alǵys bildirip, premer-mınıstrge Astananyń BUU aıasynda Halyqaralyq sý uıymyn qurý jónindegi bastamasy týraly aıtyp berdi.
Kezdesýdiń sońynda Hýn Manet Qazaqstan Prezıdentin ózine yńǵaıly ýaqytta Kambodjaǵa barýǵa shaqyrdy.