Qazaqstan Prezıdenti Qasym-Jomart Toqaev Mańǵystaý oblysyndaǵy tótenshe jaǵdaı kezinde aman qalǵan úsh áskerı qyzmetshini marapattady. Bul týraly Aqordanyń baspasóz qyzmeti habarlady, dep jazady infohub.kz.
Memleket basshysynyń Jarlyǵymen áskerı boryshyn óteý kezinde kórsetken erligi men janqıarlyǵy úshin «Erligi úshin» medalimen 29011 áskerı bóliminiń matrosy (atqysh) Beket Baqtybekuly Qýandyq, 29011 áskerı bóliminiń matrosy (atqysh) Aqjol Tımýruly Temerhan jáne 29011 áskerı bóliminiń mamany (sanıtarlyq nusqaýshy) Nıkıta Aleksandrovıch Ýdalov marapattaldy.
Kaspıdegi tragedıa 24 qyrkúıekte Áskerı-teńiz kúshteriniń oqý-jaýyngerlik tapsyrmalaryn oryndaý barysynda boldy. Daýyl men jeldiń kúrt ekpininen 17 áskerı qyzmetshi ashyq teńizge aǵyzylyp ketti: 14 adam qaza tapty, úsheýin qutqarý múmkin boldy.
Tótenshe jaǵdaıdyń sebepteri men mán-jaıyn vıse-premer Qanat Bozymbaev basqaratyn arnaıy úkimettik komısıa anyqtap jatyr. Sarbazdardyń qaza tabýyna qatysty nemquraılylyq pen keme júrgizý erejelerin buzý faktisi boıynsha qylmystyq is tergelýde. Tergeý barysy Bas prokýratýranyń baqylaýynda.
Sonymen qatar, qarsańynda memleket basshysy Qazaqstan Respýblıkasy Qorǵanys mınıstrliginiń isteriniń jaı-kúıin keshendi tekserý úshin komısıa qurdy. Ol áskerı bólimshelerdiń qarjylyq jáne materıaldyq-tehnıkalyq qamtamasyz etilýin zerdeleıdi.
Buǵan deıin «Kýrsıv» Toqaev Kaspı teńizindegi oqý-jattyǵý kezinde qaza tapqan áskerı qyzmetshilerdi óliminen keıin marapattaǵanyn jáne Qorǵanys mınıstri Dáýren Qosanovty qyzmetinen bosatqanyn jazǵan. Onyń ornyna Aıdos Myrzahmetov taǵaıyndaldy.