Astanada ótken Qazaqstan Halyq Keńesiniń birinshi sesıasynda sóılegen Prezıdent Qasym-Jomart Toqaev Qazaqstan álemniń eń básekege qabiletti 40 eliniń qataryna engenin málimdedi. Memleket basshysy eldiń álemdik arenadaǵy Orta derjava mártebesin bekitip, Qazaqstannyń tarıhy men mádenıetin shetelde nasıhattaýdy kózdep otyr, dep habarlaıdy infohub.kz saıty.
Prezıdenttiń aıtýynsha, Qazaqstan halyqaralyq yntymaqtastyqty damytyp, ınvestısıa tartýdy ulǵaıtýy qajet.
«Biz budan bylaı da halyqtyń ál-aýqatyn arttyrý jolynda tabandy eńbek etemiz. Halyqaralyq yntymaqtastyqty tereńdetip, elge keletin ınvestısıa kólemin ulǵaıtýymyz kerek», — dedi Prezıdent.
Toqaev halyqaralyq forýmdarǵa turaqty qatysyp, ózge elderdiń kóshbasshylarymen jáne ınvestorlarmen kezdesip, Astanada memleket basshylarymen jáne halyqaralyq uıymdardyń jetekshilerimen kelissózder júrgizip júrgenin eske saldy.
«Meniń aldymdaǵy maqsatym aıqyn – Qazaqstandy álemdik arenada Orta derjava retinde tanytý, tarıhymyz ben mádenıetimizdi halyqaralyq deńgeıde nasıhattaý, memlekettik múddeni qorǵaý jáne Qazaqstannyń múmkindikterin ilgeriletý. Basqa oıym joq», — dedi Toqaev.
Prezıdent bul mindetti barlyq qazaqstandyqtyń maqsaty dep te atady. Ol azamattarymyz reformalardyń tikeleı kýási bolyp qana qoımaı, onyń nátıjesin sezinip jatqanyn atap ótti.
Máselen, sońǵy 7 jylda jalpy ishki ónim 29%-ǵa ósip, 306 mıllıard dollarǵa jetti. Altyn-valúta rezervteri men Ulttyq qor aktıvteriniń kólemi 138 mıllıard dollardan asty. Osy kezeńde elimizge 162 mıllıard dollardan astam ınvestısıa tartyldy.
Memleket basshysynyń aıtýynsha, belsendi jumystyń arqasynda Qazaqstan álemniń eń básekege qabiletti 40 eliniń qataryna endi.