Qazaqstan Halyq Keńesiniń alǵashqy sesıasynda Prezıdent Qasym-Jomart Toqaev qazaq tili men eldegi basqa da tilderdiń róli týraly aıtyp, ultaralyq arazdyq qaýpi týraly eskertti, dep habarlaıdy infohub.kz saıty.
Memleket basshysy memlekettik tildiń jalpyulttyq birlik pen memlekettilikti nyǵaıtýdyń mańyzdy faktory ekenin atap ótti. «Boljam retinde aıtylǵan nárseler endi shyndyqqa aınalyp otyr. Qazaq tili eshqandaı ákimshilik, ásirese saıası májbúrleýsiz-aq, eń aldymen jastar arasynda keń taralyp keledi. Ol memlekettik til retinde de, ulttyq mádenıet pen biregeıliktiń sımvoly retinde de suranysqa ıe. Qazaq tiliniń qarapaıym negizderin bilmeý jalpy bilimsizdiktiń belgisine aınaldy», — dedi Prezıdent Qasym-Jomart Toqaev.
Onyń aıtýynsha, bul — toleranttylyq pen sendirý negizindegi birlesken jumystyń nátıjesi. «Biraq bul basqa tilderden bas tartý degendi bildirmeıdi jáne olardy qysymǵa alýǵa quqyq bermeıdi. Ózderińiz biletindeı, tildik, etnıkalyq, konfesıalyq nemese ózge de belgiler boıynsha kemsitýshilikke Konstıtýsıanyń ózi tyıym salady. Osyǵan qaramastan, kásibı arandatýshylar keıde áleýmettik jelilerde jáne naqty ómirde ultaralyq arazdyqtyń otyn tutandyrady. Túsiný kerek: olar bir ǵana maqsatqa jetýge tyrysady — qoǵamymyzdy álsiretý, Qazaqstannyń egemendigine nuqsan keltirý, halqymyzdy birlikten, demek, beıbit ári berekeli ómir súrý múmkindiginen aıyrý. Olar balalarymyz ben nemerelerimizdiń baqytty bolashaǵyna qol suǵýda», — dedi Qasym-Jomart Toqaev.
Prezıdent quqyq qorǵaý organdary men búkil qoǵam qaǵıdattylyq, qatańdyq tanytyp, «Zań jáne tártip» konstıtýsıalyq qaǵıdatyna saı áreket etýi kerektigin atap ótti. «Til — bul «Qudaıdyń jazǵany», belgili bir tilge qarsy kúres júrgizý — Jaratqanǵa jáne Ol jibergen nárselerge qarsy soǵysýǵa tyrysý degen sóz. Budan aqymaqtyqty elestetý qıyn. Sondyqtan til (kez kelgen til) birlik pen ilgerileýdiń aıqyndaýshy faktoryna aınalýy tıis», — dep qosty ol.
Sonymen qatar Qasym-Jomart Toqaev qazir túrli ult ókilderiniń jastary qazaq tili men mádenıetin belsendi túrde nasıhattaı bastaǵanyn atap ótti. «Olar — shynymen rýhanı baı, talantqa baı adamdar. Olar — eń joǵary qoǵamdyq moıyndaý men qoldaýǵa laıyq naǵyz dostyq elshileri. Memleket olardyń aldynda qaryzdar bolmaıdy, óıtkeni qoǵamymyzdyń turaqtylyǵy, memlekettiń álemdik prosesterdiń órkenıetti, tabysty qatysýshysy retindegi bedeli osyndaı azamattarǵa súıenedi», — dep atap ótti Prezıdent.
Ol birneshe jyl buryn óziniń tapsyrmasymen «El birligi» arnaıy ordeni taǵaıyndalǵanyn eske saldy. «Bul — ult birligin nyǵaıtý jáne qoǵamdyq kelisimdi qamtamasyz etý jolyndaǵy jemisti eńbek úshin beriletin erekshe marapat. Konstıtýsıalyq mártebesi men keń halyqtyq ókildigine oraı dál Qazaqstan Halyq Keńesi osy joǵary marapatqa laıyq kandıdatýralardy usynýy qısyndy ári ádil dep sanaımyn», — dedi Qasym-Jomart Toqaev.