Qazaqstan Prezıdenti Qasym-Jomart Toqaev qorǵanys mınıstri Dáýren Qosanovty qyzmetinen bosatty. Bul otstavka Kaspı teńizindegi oqý-jattyǵý kezinde 14 áskerı qyzmetshiniń qaza tabýyna baılanysty boldy, dep habarlaıdy infohub.kz saıty.
«Memleket basshysynyń Jarlyǵymen Qosanov Dáýren Jumataıuly Qazaqstan Respýblıkasynyń Qorǵanys mınıstri qyzmetinen bosatyldy», — delingen Aqorda habarlamasynda.
Buǵan deıin Qosanov Mańǵystaý oblysyna baryp, Kaspı teńizindegi oqý-jattyǵý kezinde qaza tapqan tórt merzimdi áskerı qyzmetshiniń otbasylaryna kóńil aıtty. Ol týystaryna jan-jaqty qoldaý kórsetýge ýáde berdi.
Qaıǵyly oqıǵa 24 qyrkúıekte Kaspıdegi Áskerı-teńiz kúshteriniń oqý-jaýyngerlik tapsyrmalaryn oryndaý barysynda boldy. Daýyl men qatty jeldiń saldarynan 17 áskerı qyzmetshi ashyq teńizge aǵyzylyp ketti: 14 adam qaza tapty, úsheýin qutqaryp qalý múmkin boldy. Prezıdent Qasym-Jomart Toqaev 25 qyrkúıekti jalpyulttyq aza tutý kúni dep jarıalady.
Tótenshe jaǵdaıdyń sebepteri men mán-jaıyn vıse-premer Qanat Bozymbaev basqaratyn arnaıy úkimettik komısıa anyqtap jatyr. Sarbazdardyń qaza tabýyna qatysty nemquraılylyq pen keme júrgizý erejelerin buzý faktisi boıynsha qylmystyq is tergelip jatyr, onyń barysy Bas prokýratýranyń jeke baqylaýynda. Tergeý aıasynda 30-dan astam adam jaýapqa tartylyp, kúdikti laýazymdy tulǵalardyń sheńberi aıqyndaldy.
Keıinirek Kaspı teńizinen taǵy eki áskerı qyzmetshiniń denesi tabyldy.
Buǵan deıin «Kýrsıv» Qorǵanys mınıstrliginiń bes laýazymdy tulǵasy áskerı qyzmetshilerdiń qaza tabýyna qatysty is boıynsha ustalǵanyn jazǵan. Kúdiktilerdiń qatarynda Qazaqstan áskerı-teńiz kúshteri bas qolbasshysynyń birinshi orynbasary jáne jeke quramdy túsirý júrgizilgen «Qaısar» kateriniń komandıri bar.
Keshe memleket basshysy Qorǵanys mınıstrliginiń isteriniń jaı-kúıin keshendi tekserý úshin komısıa qurdy. Ol áskerı bólimshelerdiń qarjylyq jáne materıaldyq-tehnıkalyq qamtamasyz etilýin de zerdeleıdi.