Qazaqstan Prezıdenti Qasym-Jomart Toqaev Qazaqstan Respýblıkasy Qorǵanys mınıstrligindegi isterdiń jaı-kúıin keshendi tekserý jónindegi komısıa qurý týraly ókimge qol qoıdy. Buǵan Mańǵystaýda oqý-jaýyngerlik tapsyrmany oryndaý kezinde áskerı qyzmetshilerdiń qaza tabýy sebep boldy, dep habarlaıdy infohub.kz saıty.
«Memleket basshysynyń ókimimen Qazaqstan Respýblıkasy Qorǵanys mınıstrligindegi isterdiń jaı-kúıin keshendi tekserý jónindegi komısıa quryldy», — delingen Aqordanyń Telegram-arnasyndaǵy habarlamada. Qujattyń tolyq mátini Aqordanyń resmı saıtynda jarıalandy.
Ókimde tekserý qorǵanys vedomstvosyndaǵy isterdiń jaı-kúıin, onyń ishinde áskerı bólimshelerdi qarjylyq jáne materıaldyq-tehnıkalyq qamtamasyz etý salasyn keshendi taldaý maqsatynda júrgiziletini kórsetilgen.
Komısıa tóraǵasy bolyp Qazaqstan Respýblıkasy Qaýipsizdik keńesi tóraǵasynyń orynbasary Aıda Ǵalymqyzy Balaeva taǵaıyndaldy. Onyń orynbasary — Qazaqstan Respýblıkasy Joǵary aýdıtorlyq palatasynyń tóraǵasy Álıhan Asqanuly Smaıylov.
Komısıa quramyna mynalar kirdi: Qazaqstan Respýblıkasy Prezıdenti Ákimshiligi basshysynyń orynbasary Erjan Nurlanuly Jıenbaev; Qazaqstan Respýblıkasy Qarjylyq monıtorıń agenttiginiń tóraǵasy Janat Qaldybekuly Elımanov; Qazaqstan Respýblıkasy Qaýipsizdik Keńesi Apparatynyń basshysy Murat Qalıbekuly Baımuqashev; Qazaqstan Respýblıkasynyń Qarjy mınıstri Mádı Tókeshuly Takıev; Qazaqstan Respýblıkasy Bas prokýratýrasynyń birinshi orynbasary Jandos Jánibekuly Ýmıralıev; Qazaqstan Respýblıkasy Ulttyq qaýipsizdik komıteti tóraǵasynyń birinshi orynbasary Álı Saparǵalıuly Altynbaev; Qazaqstan Respýblıkasy Ulttyq ekonomıka birinshi vıse-mınıstri Azamat Kemengeruly Amrın.
Qujatqa sáıkes, Komısıaǵa jeti kúndik merzimde atqarylǵan jumystyń alǵashqy nátıjelerin baıandaý tapsyryldy. Ókim qol qoıylǵan kúninen bastap kúshine enedi.
Eske salaıyq, 24 qyrkúıekte oqý-jaýyngerlik tapsyrmany oryndaý barysynda aýa raıynyń kenetten kúrt nasharlaýy men ekpindi jeldiń saldarynan Kaspı teńizine 17 áskerı qyzmetshi aǵyzylyp ketti, olardyń 14-i qaza tapty. Úsheýi qutqaryldy, bireýi aýrýhanaǵa jatqyzyldy.
Aldyńǵy kúni óńirdiń densaýlyq saqtaý basqarmasy pasıenttiń Mańǵystaý oblystyq kópbeıindi aýrýhanasyna jetkizilgenin habarlady. Áskerı qyzmetshiniń jaǵdaıy turaqty aýyr dep baǵalandy.
Búgin Mańǵystaýda qaza tapqan áskerı qyzmetshilermen qoshtasý rásimi ótti.