«Qazaqstan — Qytaı» ınvestısıalyq forýmynda Qazaqstan Prezıdenti Qasym-Jomart Toqaev Qytaımen máńgilik dostyqty nyǵaıtý respýblıkanyń syrtqy saıasatyndaǵy eń mańyzdy maqsattardyń biri ekenin málimdedi, dep habarlaıdy infohub.kz saıty.
Eki halyqtyń ortaq tarıhyna toqtalǵan Memleket basshysy qytaı halqy qazaq halqyna eshqashan eshqandaı zıan tıgizbegenin atap ótti. Onyń aıtýynsha, kóp jyldar boıy eki halyq ózara qurmet saqtap, bir-birine qoldaý kórsete otyryp, shynaıy úılesimde ómir súrip keledi.
«Ortaq tarıhymyzǵa úńilsek, qytaı halqy bizdiń halqymyzǵa eshqashan eshqandaı zıan tıgizgen emes. Kóp jyldar boıy eki halyq ózara qurmet saqtap, bir-birine qoldaý kórsete otyryp, shynaıy úılesimde ómir súrdi», — dedi Qazaqstan Prezıdenti.
Qasym-Jomart Toqaev qazirgi turaqsyz ári belgisiz ýaqytta Qazaqstan men Qytaı senimdi seriktes retinde kóptegen syn-qaterler men qaýipterge qarsy turý úshin ıyq tiresip, birlesip áreket etýi kerektigin qosty.
Sózin qorytyndylaı kele, Memleket basshysy qytaı maqalyn keltirdi: «Qytaı tilinde maǵynasy tereń bir maqal bar: 人心齐，泰山移 — „adamdar birikse, Taıshan taýyn da ornynan qozǵaıdy“. Qazaqstan men Qytaı dostyq pen kórshiles eki memleket retinde birlesip kez kelgen isti sátti júzege asyra alatynyna senimdimin», — dep túıindedi Qasym-Jomart Toqaev.