Qazaqstan Prezıdenti Qasym-Jomart Toqaev Linde GmbH kompanıasynyń aǵa vıse-prezıdenti Olıver Pfannmen kezdesti. Kezdesýde ınvestısıa kólemi 500 mıllıon dollarǵa jetetin jańa jobalar talqylandy. Bul týraly Aqorda habarlady, dep jazady infohub.kz.
Memleket basshysy nemis kompanıasynyń respýblıkadaǵy qyzmetin keńeıtý josparlaryn quptady. Kezdesýge qatysýshar Linde men Qarmet kompanıalary arasynda Temirtaýda jańa aýa bólý qondyrǵysyn salý týraly kelisimge qol qoıylǵanyn atap ótti.
Taraptar munaı-hımıa ónerkásibindegi birlesken jobalardy júzege asyrý perspektıvalaryn qarastyrdy. Qasym-Jomart Toqaev Atyraý jáne Mańǵystaý oblystaryndaǵy munaı-hımıa jáne hımıa klasterleriniń damýy týraly áńgimelep, Linde kompanıasyn osy salalardaǵy perspektıvaly jobalarǵa qatysýǵa shaqyrdy.
Prezıdent kompanıanyń kómirtekti ustaý jáne saqtaý salasyndaǵy ázirlemelerine, sondaı-aq sýtegi ınfraqurylymyn damytý josparlaryna erekshe nazar aýdardy. Onyń aıtýynsha, bul baǵyttar Qazaqstannyń «jasyl» ekonomıkaǵa kóshý mindetterine saı keledi.
Memleket basshysy Linde kompanıasynyń eldiń ónerkásip sektoryna qosqan úlesin joǵary baǵalady. Kompanıa ónerkásiptik gazdar men ınjınırıń salasynda álemdik kóshbasshylardyń qatarynda. Onyń tehnologıalary metalýrgıa, taý-ken, hımıa jáne energetıka salalarynda, densaýlyq saqtaý, elektrondyq ónerkásip jáne joǵary tehnologıalyq óndiriste qoldanylady.
Olıver Pfann Qasym-Jomart Toqaevqa Linde bastamalaryn qoldaǵany úshin alǵys aıtyp, seriktestikti keńeıtýge jáne Qazaqstanda jańa óndirister ashýǵa daıyn ekenin bildirdi.
Buǵan deıin «Kýrsıv» Siemens kompanıasynyń Qazaqstanda derekterdi óńdeý ortalyǵynyń ınfraqurylymyn qurýǵa qatysýǵa jáne elektr jelilerin jańǵyrtý, avtomattandyrý men sýmen jabdyqtaý úshin sheshimder usynýǵa daıyn ekenin jazǵan bolatyn. Toqaevpen kezdesýde Siemens pen Silk Road Electronics kompanıalarynyń Qarmet jabdyqtaryn jańartý jónindegi birlesken jobasy da talqylandy.
Germanıaǵa sapary barysynda Qasym-Jomart Toqaev jańa strategıalyq ýaǵdalastyqtarǵa qol jetkizilgenin málimdep, kansler Frıdrıh Mersti 2027 jyly Qazaqstanǵa memlekettik saparmen kelýge shaqyrdy.
Germanıa Prezıdenti Frank-Valter Shtaınmaıermen kelissózder qorytyndysy boıynsha taraptar birlesken deklarasıa qabyldady. 2025 jyly eki el arasyndaǵy taýar aınalymy 4,5 mıllıard dollarǵa jetti, al sońǵy 20 jylda Qazaqstanǵa nemis ınvestısıalarynyń aǵyny 8 mıllıard dollardy qurady. Frank-Valter Shtaınmaıer «Altyn Qyran» ordenimen marapattaldy.