Aqordada Prezıdent Qasym-Jomart Toqaev halyqaralyq olımpıadalardyń jeńimpazdary men júldegerleri – oqýshylar men stýdenttermen kezdesti. Saltanatty sharaǵa 21 laýreat, sondaı-aq olardyń muǵalimderi men tálimgerleri shaqyryldy. Laýreattar arasynda fızıka, hımıa, bıologıa, matematıka, ınformatıka, geografıa jáne lıngvısıka pánderinen altyn, kúmis jáne qola medaldardy ıelengender bar. Memleket basshysy daryndy jastardy ǵylymı jarystardaǵy jarqyn nátıjelerimen quttyqtap, olarǵa shynaıy rızashylyǵyn bildirdi, dep habarlaıdy infohub.kz.
– Sizder planetanyń úzdik oqýshylarymen básekede bilimderiniń eń joǵary deńgeıin kórsetip, bedeldi ıntellektýaldy jarystarda júldeli oryndarǵa laıyqty ıe boldyńyzdar. Sizderdiń kúsh-jigerlerińiz bizdiń kók baıraǵymyzdy bıik kóterip, Qazaqstannyń halyqaralyq bedelin nyǵaıtty. Qazaqstannyń jarqyn bolashaǵy – talantty, bilimdi jáne qabiletti jastardyń qolynda. Árqaısyńyz – elimizdiń naǵyz maqtanyshysyzdar! – dep atap ótti Prezıdent.
Qasym-Jomart Toqaev tabandy eńbekpen ıelengen árbir medaldyń baǵa jetpes ekenin jáne mańyzdy ekenin aıtty.
– Kún saıyn, aı saıyn joǵary maqsatqa jetý úshin úzdiksiz oqý jáne daıyndalý qabileti – tereń tártiptilik pen kúshti minezdiń shynaıy kórinisi. Uly Abaıdyń sózi bar: «Úsh-aq nárse adamnyń qasıeti: ystyq qaırat, nurly aqyl, jyly júrek». Jaqynda sizder bilikti ınjenerler, kórnekti ǵalymdar, óz isiniń naǵyz mamandary bolasyzdar. Sizder Otanymyzdyń órkendeýine yqpal etetin ozyq tehnologıalar jasap, álemdik progreske zor úles qosatyn jańalyqtar ashasyzdar dep senemin, – dedi ol.