Qazaqstan Prezıdenti Qasym-Jomart Toqaev Ombyda ótken XXII Óńiraralyq yntymaqtastyq forýmy aıasynda Reseı Prezıdenti Vladımır Pýtınmen kezdesýde ekijaqty yntymaqtastyqtyń negizgi máselelerin, sonyń ishinde Qazaqstandaǵy alǵashqy atom elektr stansıasynyń qurylysyn talqylady, dep habarlaıdy infohub.kz saıty.
Qasym-Jomart Toqaev Vladımır Pýtındi jyly qabyldaǵany úshin alǵys aıtyp, qazaq-reseı yntymaqtastyǵynyń negizgi baǵyttary boıynsha mazmundy dıalogty jalǵastyrýdyń mańyzdylyǵyn atap ótti. «Biz óte iri saýda seriktesterimiz. 2025 jyly saýda kólemi shamamen 28 mlrd dollardy qurady, ári bıylǵy jyldyń úrdisi óte oń. 2025 jyldyń 5 aıymen salystyrǵanda, osy 5 aı ózara saýdanyń jaqsy ósimin kórsetti. Investısıalarǵa keler bolsaq, Reseı bizdiń ekonomıkamyzǵa ınvestorlar arasynda birinshi orynǵa shyǵyp otyr. Investısıa kólemi 30 mlrd dollarǵa jýyqtady. Óte qyzyqtysy, bizdiń ekijaqty kúsh-jigerimizben 177 perspektıvaly ónerkásiptik jobanyń pýly irikteldi, onyń 122-si júzege asyryldy. Al osy 177 jobanyń jalpy kólemi 53 mlrd dollardy quraıdy. Bul qazirgi kúrdeli geosaıası jaǵdaıdy eskersek, aıtarlyqtaı kólem», — dedi Qazaqstan Prezıdenti.
Memleket basshysy gýmanıtarlyq saladaǵy ózara is-qımyl deńgeıin joǵary baǵalap, reseılik kóshbasshyǵa Ombyda Qazaq ulttyq ýnıversıtetiniń fılıalyn ashýǵa qoldaý kórsetkeni úshin alǵys bildirdi. Qasym-Jomart Toqaev Qazaqstandaǵy alǵashqy atom stansıasyn birlesip salý jobasyn iske asyrýdaǵy ilgerileýdi atap ótti.
«Maǵan Balqash kóli mańyndaǵy alańda dalalyq jumystar aıaqtalyp jatqanyn habarlady. Bul joba Qazaqstan aýmaǵynda jańa energıa túrin óndirýmen ǵana baılanysty emes. Bul joba eki memleketimizdi jáne eń bastysy, elderimizdiń halyqtaryn, ásirese jas urpaqty jaqyndastyratyn joba. Óıtkeni biz Reseıdiń kómegimen tehnıkalyq kadrlardy — jergilikti, qazaq kadrlaryn daıarlaý týraly sóz qozǵap otyrmyz. Olar keıin atom ındýstrıasy sıaqty óte kúrdeli salada jumys isteı alatyn bolady», — dep sanaıdy Prezıdent.