Qazaqstan Prezıdenti Qasym-Jomart Toqaev Germanıadaǵy brıfıńte buǵan deıin Ombyda aıtqan soǵysty toqtata turý týraly málimdemesine túsinik berip, Reseıdegi ahýalǵa da baǵa berdi, dep habarlaıdy infohub.kz saıty.
Bul suraqty Memleket basshysyna ARD telearnasynyń tilshisi Demıan fon Osten qoıdy. Jýrnalıs Qazaqstan Prezıdentinen Ombyda soǵysty toqtata turý qajettigi týraly aıtqan sózin túsindirip, Reseıdegi jaǵdaıǵa baǵa berýin surady.
«Búgin men aıtarlyqtaı senimmen aıttym: Prezıdent Pýtın memleket qaıratkeri retinde, Reseıdiń basshysy retinde — sizderge qanshalyqty oǵash estilse de — Ortalyq Azıa úshin de, onyń ishinde Qazaqstan úshin de, Eýropa men búkil álem úshin de eń qolaıly saıası tulǵa. Men ony jaqsy bilemin, ol tarıhy kúrdeli úlken memleketti basqarýǵa qajetti qasıetterge ıe, óz eliniń aldynda turǵan strategıalyq maqsattaryn tereń túsinedi», — dedi Qasym-Jomart Toqaev.
Qazaqstan Prezıdenti sondaı-aq Ýkraınada bolyp jatqan jaǵdaıdy bári alańdaýshylyqpen qadaǵalap otyrǵanyn atap ótti. Onyń aıtýynsha, Qazaqstan basynan bastap Birikken Ulttar Uıymy Jarǵysynyń erejelerin ustanatynyn aıtyp kelgen.
«Biz barlyq memlekettiń aýmaqtyq tutastyǵy qaǵıdatyn qurmetteýge jáne saqtaýǵa basa mán beremiz. Basynan bastap ýkraın halqyn, onyń tarıhyn, mádenıetin, dástúrlerin jáne, árıne, ýkraın tilin zor qurmetteıtinimizdi aıtyp keldik», — dedi Memleket basshysy.
Sonymen qatar Qasym-Jomart Toqaev soǵysty toqtata turý týraly málimdemesiniń mánin naqtylady. «Men soǵysty dereý toqtatý kerek dep aıtqan joqpyn. Qazirgi jaǵdaıda onyń iske asýy ekitalaı ekenin túsinemin. Men Ýkraına aýmaǵyndaǵy áskerı qımyldardy toqtata turyp, dıplomatıalyq nemese kez kelgen basqa da kelissózder úderisine kóshýdi aıtyp otyrmyn», — dep keltiredi onyń sózin Aqorda.