Qazaqstan Prezıdenti Qasym-Jomart Toqaev Rhenus Group kompanıalar tobynyń basqarma tóraǵasy Tobıas Bartspen kezdesti. Kezdesýde taraptar kólik-logıstıka salasyndaǵy áriptestikti damytý men birlesken ınfraqurylymdyq jobalardy talqylady, dep habarlaıdy infohub.kz saıty.
Memleket basshysy nemis kompanıasy kóp jyldan beri Qazaqstannyń kólik baılanysyn nyǵaıtýǵa úles qosyp kele jatqanyn atap ótti. Ol eldiń kontınenttegi negizgi logıstıkalyq ortalyqtardyń birine aınalýǵa umtylysyn aıryqsha atady.
Kelissózderde Transkaspı halyqaralyq kólik baǵdaryn damytýǵa erekshe nazar aýdaryldy. Toqaev zamanaýı porttar, termınaldar, temirjoldar men sıfrlyq servısterdi qamtıtyn básekege qabiletti baǵdar qurýdy birlesip qolǵa alýdy usyndy. Sondaı-aq ol Rhenus kompanıasynyń Aqtaý portyndaǵy mýltımodaldy hab jobasyna qatysýyn qoldady.
Óz kezeginde Tobıas Barts Qazaqstandy kólik-logıstıkalyq torap retinde zor áleýetke ıe dep baǵalaıtynyn málimdep, kompanıanyń birlesken jobalarǵa qatysýǵa múddeli ekenin rastady.
Kezdesý qorytyndysy boıynsha taraptar yntymaqtastyqty keńeıtýge kelisti.
Anyqtama: Rhenus Group — shtab-páteri Holsvıkkede ornalasqan, 1912 jyly qurylǵan nemis logıstıkalyq kompanıasy. Onyń álem boıynsha 1 100-den astam ókildigi bar, shtaty shamamen 39–41 myń qyzmetkerdi quraıdy, al jyldyq túsimi 8,2 mlrd eýroǵa jetedi. Rhenus kelisimsharttyq logıstıka, júk tasymaly, port qyzmetteri jáne qoǵamdyq kólik salalarynda jumys isteıdi. Atap aıtqanda, kompanıa uzaq ýaqyt boıy IKEA-nyń negizgi logıstıkalyq seriktesi bolyp keledi jáne Germanıa men Nıderlandyda kún panelderi men geotermaldy jylytý júıeleri bar logıstıkalyq ortalyqtardy qosa alǵanda, iri qoıma jobalaryn júzege asyrdy.