Qazaqstan Prezıdenti Qasym-Jomart Toqaev Qytaı Halyq Respýblıkasynyń tóraǵasy Sı Szınpınge quttyqtaý jedelhatyn joldady, dep habarlaıdy infohub.kz saıty.
Memleket basshysynyń baspasóz qyzmeti málim etkendeı, Qasym-Jomart Toqaev Sı Szınpındi Qytaı Halyq Respýblıkasy qurylǵannan bergi 77 jyldyǵymen quttyqtady.
«Jańarý men jańǵyrtýdyń sımvolyna aınalǵan bul data Uly Qytaı tarıhynda erekshe oryn alady. Óziniń biregeı dástúrleri men baı mádenıetin saqtaı otyryp, sizdiń elińiz damý men ekonomıkalyq órleýdiń jarqyn úlgisin kórsetip otyr. Qytaıdyń ǵylym, tehnologıa, ınovasıa jáne sıfrlyq ekonomıka salalaryndaǵy tańǵalarlyq jetistikteri búkil álemniń tánti bolýyn týdyrary sózsiz», — delingen jedelhatta.
Qasym-Jomart Toqaev dostyq pen tatý kórshilikke negizdelgen eki el arasyndaǵy máńgilik jan-jaqty strategıalyq seriktestik búginde buryn-sońdy bolmaǵan qarqynmen damyp kele jatqanyn atap ótti.
Sonymen qatar prezıdent bıyl Shanhaıda ótken kezdesý ózara yntymaqtastyqtyń keleshegine ortaq kózqarasty nyǵaıtyp, kópqyrly ózara is-qımyldyń jańa belesterin ashqanyn aıryqsha atady.
Prezıdent QHR tóraǵasyna jaýapty memlekettik qyzmetinde tabys, al Qytaıdyń baýyrlas halqyna amandyq pen órkendeý tiledi.