Qazaqstan Prezıdenti Qasym-Jomart Toqaev brıfıńte eldegi sıfrlandyrý men jasandy ıntellekttiń róli týraly aıtty, dep habarlaıdy infohub.kz.
Jýrnalıser memleket basshysynan sıfrlandyrý men jasandy ıntellekt qazaqstandyqtardyń kúndelikti ómirine qanshalyqty áser etip jatqanyn surady. Prezıdent bıylǵy jyldyń Sıfrlandyrý jáne jasandy ıntellekt jyly dep jarıalanǵanyn eske salyp, bul týraly jańa Joldaýda tolyǵyraq aıtylatynyn qosty.
«Biz sıfrlyq memleket — sıfrlyq qyzmetter memleketin qurýdyń birinshi kezeńinen óttik. Ózderińiz kórip otyrsyzdar, basqa eldermen salystyrǵanda ómir aıtarlyqtaı jeńildedi. Úıińizden shyqpaı-aq, buryn kóp ýaqyt pen túrli mekemelerdi aralaýdy qajet etetin kóptegen isterdi atqara alasyz. Sondyqtan bul — sıfrlyq servıs memleketi, bul qajetti kezeń. Qazir biz ekinshi kezeńdemiz, men úkimetke prezentasıalyq kezeńde, halyqaralyq kelissózder júrgizý satysynda turyp qalmaýdy tapsyrdym», — dedi Qasym-Jomart Toqaev.
Onyń aıtýynsha, sıfrlandyrý men jasandy ıntellektti adamdarǵa, barlyq qazaqstandyqtarǵa qyzmet etýge jumyldyrý qajet. «Qarapaıym tilmen aıtqanda, smartfon — bul tek oıynshyq emes. Smartfon — bul tek TikTok kóretin qural emes. Smartfon — aqsha tabýdyń quraly. Máseleni osylaı qoıý kerek. Bul ásirese aýyl sharýashylyǵy óndirýshilerine qatysty, olar óz óńirlerinen shyqpaı-aq, aýyldyq jerde turyp, bıznes júrgizý úshin zamanaýı tehnologıany paıdalana alady jáne paıdalanýy tıis. Mine, osy mindetti kelesi kezeńde bizdiń úkimet atqarady», — dep atap ótti prezıdent.