Qazaqstan Prezıdenti Qasym-Jomart Toqaev tótenshe jaǵdaılar mınıstri Shyńǵys Arınovpen kezdesý ótkizdi, dep habarlaıdy infohub.kz saıty.
Kezdesý barysynda memleket basshysy vedomstvonyń jumys qorytyndylary, azamattyq qorǵaý júıesin jańǵyrtý barysy jáne aldaǵy kezeńge arnalǵan josparlar týraly baıandamany tyńdady, dep habarlaıdy Aqordanyń baspasóz qyzmeti.
Shyńǵys Arınov TJM-niń materıaldyq-tehnıkalyq bazasyn nyǵaıtý týraly baıandady. Onyń aıtýynsha, sońǵy eki jylda bólimsheler 1,4 myńnan astam tehnıka, avıasıa, zamanaýı qutqarý jabdyqtary, ushqyshsyz ushý apparattary jáne baılanys quraldaryn aldy. Bul el boıynsha tótenshe jaǵdaılarǵa den qoıýdyń jedeldigin aıtarlyqtaı arttyrýǵa múmkindik berdi. Sonymen qatar TJM bólimshelerin renovasıalaý júrgizilýde.
Mınıstr sondaı-aq bólimsheler jelisin damytý, jańa ámbebap qutqarý quramalaryn, avıasıalyq jáne teńiz otrádtaryn qurý týraly aıtty. «Aýyl qutqarýshylary» baǵdarlamasy aıasynda 700-ge jýyq eldi mekendi qorǵaýdy qamtamasyz etetin 237 erikti órt sóndirý beketi salyndy.
Sonymen qatar, halyqty tótenshe jaǵdaılarda jappaı habardar etý júıesin damytý jalǵasýda, Jaǵdaıattyq ortalyqtyń múmkindikteri keńeıtilýde, tabıǵı órtterdi erte anyqtaý júıeleri ıntegrasıalanýda.
TJM basshysy vedomstvo qyzmetkerlerin áleýmettik qoldaý sharalary týraly da aqparat berdi. Turǵyn úı tólemderi qarastyrylǵan. TJM qyzmetkerlerine arnalǵan mamandandyrylǵan turǵyn úı klasteriniń jobasy iske asyrylýda, ol órt sóndirý bólimderi men qutqarý bazalarynyń janynda qajetti ınfraqurylymy bar turǵyn úılerdi salýdy kózdeıdi.
Prezıdent mınıstrliktiń azamattyq qorǵaý júıesin jetildirý boıynsha atqaryp jatqan jumysyn oń baǵalady. Ol jergilikti atqarýshy organdarmen birlesip, aýdandyq jáne aýyldyq qutqarý bólimsheleriniń materıaldyq-tehnıkalyq bazasyn nyǵaıtý, zamanaýı tehnologıalardy engizý jáne órt qaýipsizdigi deńgeıin arttyrý jumystaryn jalǵastyrýdy tapsyrdy.