Qazaqstan Prezıdenti Qasym-Jomart Toqaev Túrikmenstan basshylyǵyna el Táýelsizdiginiń 35 jyldyǵyna oraı quttyqtaý jedelhattaryn joldady, dep habarlaıdy infohub.kz saıty.
Prezıdenttiń baspasóz qyzmetiniń málimetinshe, quttyqtaý jedelhattary Túrikmenstan Prezıdenti Serdar Berdimuhamedovke jáne túrikmen halqynyń ulttyq kóshbasshysy, Halyq Maslahatynyń tóraǵasy Arqadaǵ Gýrbangýly Berdimuhamedovke arnalǵan.
Memleket basshysy baýyrlas Túrikmenstannyń bul merekeni bedeldi, damyǵan memleket mártebesinde qarsy alyp otyrǵanyn atap ótti. Onyń jetistikteriniń negizinde túrikmen halqynyń kelisimi men birligi, baı mádenıeti jáne jasampaz rýhy jatyr.
«Táýelsizdik jyldarynda elińiz áleýmettik-ekonomıkalyq jańǵyrýda, azamattardyń ál-aýqatyn arttyrýda aıtarlyqtaı tabystarǵa qol jetkizip, pozıtıvti beıtaraptyq qaǵıdattarynda berik turǵan memleket retinde halyqaralyq ustanymyn nyǵaıtty. Qazaqstan Túrikmenstanmen dostyq qarym-qatynasty joǵary baǵalaıdy, tatý kórshilik pen ózara qoldaý rýhyndaǵy kópqyrly yntymaqtastyqty nyǵaıtýǵa zor mán beredi», — delingen quttyqtaýda.
Qazaqstan Prezıdenti Túrikmenstan basshylyǵyna memlekettik qyzmette jańa jetistikter, al baýyrlas túrikmen halqyna ıgilik pen órkendeý tiledi.