Qazaqstan Respýblıkasynyń Ulttyq olımpıadalyq komıteti 2026 jylǵy Azıa oıyndarynda marafondyq sporttyq júriste márege birinshi bolyp jetken Iasmına Toksanbaevanyń dıskvalıfıkasıalaný sebepterin túsindirdi. Negiz retinde sportshynyń aıaq kıiminiń úlgisi Dúnıejúzilik jeńil atletıka qaýymdastyǵy (World Athletics) bekitken tizimge sáıkes kelmeýi ataldy, dep habarlaıdy infohub.kz saıty.
27 qyrkúıekte Toksanbaeva Azıada-2026-da jeńiske jetip, marafondyq sporttyq júris qashyqtyǵyn 3 saǵat 22 mınýt 20 sekýnd nátıjemen birinshi bolyp eńserdi. Qazaqstandyq sportshy jaqyn qarsylasynan shamamen tórt mınýt ozyp, bastapqyda jarys jeńimpazy dep jarıalandy.
Márege jetkennen keıin tehnıkalyq delegattar erler men áıelder týrnırleriniń úsh júldegeriniń aıaq kıimin tekserdi. Toksanbaevanyń krosovka úlgisi World Athletics maquldaǵan tizimde joq ekeni anyqtaldy. Aıaq kıimniń sýretteri men qajetti aqparat halyqaralyq federasıaǵa jiberilip, resmı qorytyndy alynǵansha marapattaý rásimi keıinge shegerildi.
Keıin World Athletics qazaqstandyq sportshy paıdalanǵan úlginiń qoldanystaǵy talaptarǵa sáıkes kelmeıtinin rastady. Halyqaralyq federasıanyń erejelerine sáıkes, mundaı jaǵdaıda sportshynyń nátıjesi jaramsyz dep tanylyp, jarystyń qorytyndy hattamasy túzetiledi.
Jarys aıaq kıimine qoıylatyn talaptar World Athletics Keńesiniń 2026 jylǵy 19 naýryzdaǵy sheshimimen jańartylyp, 20 sáýirde kúshine endi. QR UOK naqtylaǵandaı, ózgerister týraly aqparat barlyq ulttyq federasıalarǵa jiberilgen.
Osyndaı jaǵdaı aǵymdaǵy Azıadada buǵan deıin de oryn alǵan. Irandyq jetisaıysshy Fatıma Mohıtzadeniń nátıjesi de ruqsat etilgen tizimge kirmegen aıaq kıim úlgisine baılanysty joıyldy. Hattama qaıta qaralǵannan keıin qazaqstandyq Alına Chıstákova tórtinshi orynnan úshinshi orynǵa kóterilip, qola medal aldy.
QR UOK World Athletics, Azıalyq jeńil atletıka qaýymdastyǵy, Azıa olımpıadalyq keńesi jáne Qazaqstan jeńil atletıka federasıasymen yntymaqtastyqty jalǵastyryp jatqanyn habarlady. Taraptar apelásıa berý múmkindigin de qarastyrýda.