Qazaqstandyq XDS Astana Team komandasynyń ýrýgvaılyq veloshabandozy Gılermo Tomas Sılva 26 shilde jeksenbi kúni Ispanıa joldarynda qatarynan ekinshi jeńiske qol jetkizip, Kastılıa jáne Leon klasıkasyn utyp aldy, dep habarlaıdy infohub.kz.
Ótken demalys kúnderi Ispanıada eki klasıkalyq bir kúndik jarys ótti: Ordısıa-de-Vıláfranka klasıkasy (eldegi eń kóne kásibı birkúndik jarys, 1922 jyldan beri ótkiziledi) jáne Kastılıa jáne Leon klasıkasy (buryn kópkúndik bolǵan; 2006 jyly kópkúndik formatta ony XDS Astana Team bas menedjeri Aleksandr Vınokýrov jeńgen bolatyn). 25 shilde senbi kúni Tomas Sılva uzyndyǵy 167 shaqyrym bolatyn saqınaly marshrýtta Ordısıa-de-Vıláfranka klasıkasy aıasynda jeńiske jetti, al onyń komandalasy ıtalıalyq Krıstıan Skaronı tórtinshi bolyp márege keldi.
Jeksenbi kúni qazaqstandyq klýbtyń shabandozdary Benavente men Lúbıan qalalary arasyndaǵy 190,6 shaqyrymdyq qashyqtyqta favorıt retinde start aldy. Tomas Sılva qaıtadan úzdik shyǵyp, 4 saǵat 23 mınýt 41 sekýndta qashyqtyqty eńserip, Movistar komandasynan ıspandyq Rodjer Adrıany fınaldyq sprıntte jeńdi (ol da sol ýaqytpen márege keldi). Fınalda Krıstıan Skaronı kómektesip, bul joly jeńimpazben birdeı ýaqyt kórsetip, úzdik úshtikti túıindedi.
«Astananyń» taǵy bir ókili, ıtalıalyq Dıego Ýlıssı segiz sekýnd keshigip, segizinshi oryn aldy. Aýstrıalyq Marko Shrettl 4 mınýt 29 sekýnd artta qalyp, 53-shi bolyp márege keldi, ıtalıalyq Davıde Toneattı dál sol ýaqytpen 54-shi orynǵa turaqtady. Italıalyq Sımone Zanını 14 mınýt 53 sekýnd joǵaltyp, 79-shy oryndy ıelendi. «Astananyń» taǵy bir ıtalıalyǵy Lúdovıko Mellano jarysty aıaqtamady — barlyǵy startqa shyqqan 106 shabandozdyń 26-sy shyǵyp qaldy.
«Bul — meniń eki kún ishindegi ekinshi jeńisim, men óte qýanyshtymyn, — dedi Tomas Sılva. — Eń aldymen búgingi komandanyń keremet jumysyn atap ótkim keledi. Jigitter zor eńbek etip, maǵan, Krıstıan Skaronı men Dıego Ýlıssıge sońǵy kóterilýde jeńis úshin kúresýge tolyq múmkindik qaldyrdy. Biz óz kartalarymyzdy tamasha oınadyq, jáne búkil komandanyń tamasha jumysyn jeńispen, sondaı-aq Skaronıdiń úshinshi ornymen aıaqtaǵanyma óte qýanyshtymyn. Biz birge óner kórsetkende ózimizdi keremet sezinemiz, jáne sol baǵytta jalǵastyra beremiz dep senemin», — dep túıindedi ol.