AQSh Prezıdenti Donald Tramp Aq úıge CNN, MS Now jáne Politico basylymdarynyń kirýine tyıym salǵanyn jarıalady. Bul týraly ol Truth Social platformasyndaǵy jazbasynda málimdedi, dep habarlaıdy infohub.kz saıty.
Juma kúni tústen keıin jarıalanǵan jazbasynda AQSh Prezıdenti bul basylymdardy «turaqty túrde jalǵan jańalyq taratady» dep aıyptap, olardy Aq úıden shyǵaryp jibergenin málimdedi. Sonymen qatar ol ózge de basylymdarǵa osyndaı tyıym salynýy múmkin ekenin eskertti.
«Medıa uıymdar AQSh Prezıdenti, Tramp ákimshiligi nemese Amerıka Qurama Shtattary týraly jazǵanda únemi jalǵan aqparat pen ótirik jarıalaı bermeýi kerek. Basqa da jalǵan jańalyq taratatyn medıa uıymdar kezekte tur», — dedi ol.
Aq úıge qaıta oralǵannan beri Tramp iri dástúrli medıa uıymdardyń aqparatqa qol jetkizýin buryn-sońdy bolmaǵan dárejede shektep keledi. Atap aıtqanda, Associated Press agenttigi Meksıka shyǵanaǵyn óz materıaldarynda «Amerıka shyǵanaǵy» dep ataýdy jalǵastyrǵany úshin Aq úıdegi Oval kabınetindegi jáne Air Force One ushaǵyndaǵy baspasóz pýlynyń is-sharalaryna jiberilmedi.
Sonymen qatar Pentagon jýrnalıserdiń qupıa aqparatty jınaý jáne jarıalaý múmkindigin shekteıtin jańa baspasóz saıasatyn engizýge árekettendi. Bul qujatqa qol qoıýdan bas tartqan medıa uıymdarynyń jappaı narazylyǵyna ákep soqty. Keıinirek federaldy sýdıa bul saıasatty AQSh Konstıtýsıasyna qaıshy dep tanydy.
Buǵan qosa, Prezıdent New York Times, Wall Street Journal, CNN, ABC News jáne BBC sıaqty iri basylymdarmen ashyq sot daýlaryn bastady.