AQSh Prezıdenti Donald Tramp Belarýsten «aýqymdy» tyńaıtqysh satyp alý kelisimi boıynsha jumys júrgizip jatqanyn málimdedi. Bul qadam saýda daýy ýshyǵyp turǵan Kanadadan bas tartyp, Reseıdiń odaqtasyna bet burýdy bildiredi, dep habarlaıdy infohub.kz saıty.
«Amerıka Qurama Shtattary Belarýsten kalı satyp alýǵa qatysty aýqymdy kelisim jasaý ústinde», — dedi Tramp óziniń Truth Social áleýmettik jelisinde. «Baǵasy biz qazir Kanadaǵa tólep jatqannan aıtarlyqtaı tómen bolady. Bul — fermerlerimiz ben mal ósirýshilerimiz úshin óte jaqsy jańalyq».
Sońǵy aptalarda Tramp uzaq jylǵy odaqtas ári AQSH-tyń kalıdiń eń iri jetkizýshisi sanalatyn Kanadamen saýda soǵysyn kúsheıtti.
Dúısenbidegi bul málimdeme Vashıngtonnyń Mınskimen dıalog júrgizýge daıyn ekenin kórsetedi. Alaıda Belarýs bıligi dıssıdentterdi qýdalap, Reseıdiń Ýkraınaǵa basyp kirýin qoldap otyr.
AQSh kalıdiń basym bóligin syrttan ákeledi. Bul hımıalyq tuz tyńaıtqysh óndirýde qoldanylady. 2022 jyly Ýkraınadaǵy soǵys bastalǵannan keıin onyń baǵasy kúrt ósti.
AQSh Geologıalyq qyzmetiniń derekterine qaraǵanda, 2024 jyly kalıdiń 79 paıyzy Kanadadan, 11 paıyzy Reseıden, 4 paıyzy Belarýsten jetkizilgen.
Tramptyń ekinshi ákimshiligi kezinde Vashıngton Belarýspen qarym-qatynasty jumsartýǵa únsiz kiristi. Ótken aptada Belarýs 25 saıası tutqyndy bosatty, al AQSh eki kompanıaǵa salynǵan sanksıalardy alyp tastady.
Alaıda 1994 jyldan beri bılik basynda otyrǵan Prezıdent Aleksandr Lýkashenko 2020 jylǵy saılaýdan keıingi jappaı narazylyqty basyp-janshyǵan soń, júzdegen adam áli de túrmede. Odan keıin sanksıalar tolqyny bastaldy.
2022 jyly Mınsk Máskeýge óz aýmaǵy arqyly Ýkraınaǵa basyp kirýge ruqsat bergen soń, Batys elderi Belarýske qaıtadan sanksıalar saldy.
Belarýstiń jer aýdarylǵan opozısıa kóshbasshysy Svetlana Tıhanovskaıa dúısenbide Lýkashenkomen kez kelgen kelisim «óte qaýipti» ekenin eskertti.
«Bizdiń ustanymymyz — kalıden túsken barlyq tabys qýdalaýǵa jáne Reseıdiń soǵys mashınasyn qoldaýǵa ketip jatqanda, rejımmen saýda jasaýǵa áli erte», — dedi Tıhanovskaıa Agence France-Presse agenttigine.
Alaıda ol amerıkandyqtar «Lýkashenkonyń kim ekenin biledi» dep senetinin atap ótti.