AQSh prezıdenti Donald Tramp Danıa men Grenlandıamen kelisimge qol qoıylǵanyn jarıalady. Oǵan sáıkes Vashıngton aral qaýipsizdigin turaqty baqylaýǵa alady. Bul týraly Aq úı basshysy Truth Social áleýmettik jelisinde jazdy, dep habarlaıdy Reuters, infohub.kz saıtyna silteme jasap.
Tramptyń aıtýynsha, kelisim AQSH-qa Grenlandıa aýmaǵynda araldy jáne óz ulttyq qaýipsizdigin qorǵaý úshin qajet dep tapqan kez kelgen áreketti merzimsiz júzege asyrýǵa múmkindik beredi.
«AQSh Grenlandıada ony qorǵaý úshin qajettiniń bárin jasaýǵa máńgilik tolyq múmkindik alady», — dedi Tramp.
Amerıka prezıdenti AQSh qarsylas sanaıtyn elder endi Grenlandıada áskerı baza ornalastyra almaıtynyn, ózge de áskerı qatysýyn qura almaıtynyn nemese Vashıngtonnyń jazbasha ruqsatynsyz «sezimtal ınvestısıalar» jasaı almaıtynyn da málimdedi.
Tramp qol jetkizilgen ýaǵdalastyqty «sheksiz merzimge» arnalǵan kelisim dep atady. Onyń sózinshe, ol AQSH-tan qosymsha shyǵyn talap etpeıdi. Vashıngton araldyń jekelegen aýdandarynda aıtarlyqtaı áskerı qatysý qurýǵa kirispek.
Sonymen qatar kelisim Grenlandıany AQSH-qa berýdi kózdemeıdi. Aral Danıa Kоróldigi quramyndaǵy avtonomıalyq aýmaq bolyp qala beredi. Buǵan deıin Tramp Grenlandıany AQSH-tyń tolyq baqylaýyna alǵysy keletinin birneshe ret málimdegen.
Prezıdenttiń málimdemesine deıin Reuters Vashıngton men Kopengagen araldaǵy amerıkandyq áskerı qatysýdy keńeıtý týraly kelisimge jaqyndaǵanyn habarlaǵan. Kelissózder Golden Dome zymyranǵa qarsy qorǵanys júıesiniń elementterin yqtımal ornalastyrýdy jáne aımaqtaǵy Qytaıdyń belsendiligin shekteýdi qozǵady.
AQSh Grenlandıada Pıtýffık ǵarysh bazasyn áldeqashan ornalastyrǵan. Araldaǵy amerıkandyq áskerı qatysý Danıamen 1951 jylǵy kelisimmen retteledi.