AQSh prezıdenti Donald Tramp FIFA prezıdenti Djannı Infantınoǵa qoldaý bildirdi, dep habarlaıdy infohub.kz saıty.
Tramp qoldaý sózderin Truth Social áleýmettik jelisindegi paraqshasynda jarıalady. «FIFA eger qandaı da bir sebeppen prezıdent Djannı Infantınony aýystyrýdy oılasa, bul óte úlken qatelik bolar edi. Ol óz jumysyn tamasha atqaryp jatyr — dál onyń basshylyǵymen tarıhtaǵy eń sátti álem chempıonaty ótti, ári meniń aıtýymsha, ol aldyńǵylardan tórt ese sátti boldy. Eger ol bul qyzmette bolmasa, kelesi álem chempıonaty eshqashan mundaı sátti nemese tabysty bolmaıdy!» — dedi Aq úıdiń basshysy.
Buǵan deıin FIFA álem chempıonattarynyń — erler, áıelder jáne klýbtyq — quqyqtaryn jeke ınvestorlarǵa satý jobasyn qurǵan bolatyn. Eýropalyq fýtbol qaýymdastyqtary odaǵynyń (ÝEFA) barlyq músheleri buǵan jaýap retinde osy bastamadan tolyq bas tartqanǵa deıin FIFA týrnırlerine boıkot jarıalady. ÝEFA ustanymyn Amerıka jáne Azıa konfederasıalary qoldady. Olardyń barlyǵy FIFA-ny jańa komersıalyq tujyrymdamany qalyptastyrý kezinde jetkilikti ashyqtyq tanytpady dep aıyptady.
Janjal aıasynda FIFA basshysynyń keńesshisi narazylyq retinde jumystan bosatylǵany belgili boldy. ÝEFA tipti álem chempıonatynyń óz nusqasyn ótkizý josparyn ázirledi.
Osydan keıin FIFA álem chempıonatynyń quqyqtaryn satý boıynsha janjaldy jospardan bas tartty. Kóp uzamaı FIFA basshylyǵy Infantınoǵa qoldaý bildirip, ÁCh quqyqtaryn satý jobasyndaǵy qatelikterdi moıyndady.
Sonymen qatar, jaqynda Halyqaralyq fýtbol federasıasy Infantınonyń bedeline nuqsan keltirý áreketteri týraly málimdedi. Janjal aıasynda birqatar fýtbol federasıalary FIFA prezıdenti Djannı Infantınony synaǵan ashyq hat jarıalady. Al amerıkandyq fýtbol federasıalary FIFA basqarý qurylymynda ózgerister engizýge shaqyrǵan birlesken málimdeme jasady.