AQSh prezıdenti Donald Tramp Iranǵa qarsy jańa aýqymdy áskerı shabýyl jasaý múmkindigin qarastyryp jatqanyn málimdep, jaqyn arada qaqtyǵysty aıaqtaý týraly mańyzdy sheshim jarıalaıtynyn ýáde etti, dep habarlaıdy infohub.kz saıty.
Amerıka kóshbasshysynyń aıtýynsha, Vashıngton ári qaraıǵy áreketter týraly sheshýshi qadam jasaýǵa tıis. Ol bul týraly Axios basylymyna bergen suhbatynda aıtty.
«Men mańyzdy sheshim qabyldaýym kerek. Basyp kirip, olardy (Iran rejımin) joıýdy qalaımyn ba, joq pa? Bul mańyzdy sheshim. Meniń basyma ne bolaryn eshkim bilmeıdi», – dedi Tramp.
Buǵan deıin Tramp soǵys jaqyn arada aıaqtalýy múmkin ekenin aıtqan. Ol kelisimge tez jetýge úmittenetinin bildirip, Tegeran beıbit kelisimge múddeli dep esepteıtinin jetkizdi. Alaıda AQSh prezıdenti mámileniń yqtımal sharttaryn ashpady jáne kelissózderdiń qaı kezeńde turǵanyn habarlamady.
Sonymen qatar Tramp Iranmen qaqtyǵysta AQSH-ty qoldamaǵan elderden Vashıngtonǵa keltirilgen shyǵyndy óteýdi talap etti. Onyń sózinshe, Amerıkaǵa kómektesýden bas tartqan memleketter soǵys aıaqtalǵan soń «esep aıyrysýǵa» májbúr bolady.
Buǵan deıin Tramp qaqtyǵystyń jaqyn arada bitýi múmkin ekenin aıtqanymen, beıbit kelisimniń naqty merzimi men sharttaryn atamaǵan.
Osy ýaqytta Iran deldaldar arqyly AQSH-qa Ormýz buǵazyn ashý úshin jeti shart jiberdi. Tegerannyń talaptary qatarynda áskerı qaýip-qaterlerdi toqtatý, teńiz blokadasy men sanksıalardy alý, aktıvterdi bosatý, shyǵyndy óteý jáne keme qatynasynyń qaýipsizdigine kepildik berý bar. Vashıngtonnyń ashýdy talap etýine qaramastan, buǵazdyń ońtústik baǵyty jabyq kúıinde qalyp otyr. Iran men Oman jańa baǵyttardyń bólshekteri týraly kelisti.