AQSh prezıdenti Donald Tramp Iranǵa qarsy «joıqyn ekonomıkalyq operasıa» bastalǵanyn málimdep, basqa elderdi saldar týraly eskertti, dep habarlaıdy infohub.kz.
Tramp óziniń Truth Social áleýmettik jelisinde Iranǵa kelisim jasaýǵa odan artyq múmkindikti eshkim bermegenin, alaıda el bul múmkindikti paıdalanbaǵanyn jazdy.
«Búgin men kez kelgen elge qarsy júrgizilgen eń joıqyn ekonomıkalyq operasıanyń bastalǵanyn jarıalaımyn! Bul teńdesi joq aýqymdaǵy ekonomıkalyq soǵys pen oqshaýlaý bolady», — dedi amerıkandyq kóshbasshy.
Aq úı basshysy basqa elderge eskertý jasady: «Qarjy ınstıtýttaryna, kásiporyndarǵa, áýejaılarǵa nemese memlekettik qurylymdarǵa Iranǵa qandaı da bir qoldaý kórsetýge ruqsat bergen kez kelgen el ózi de orasan zor ekonomıkalyq saldarǵa tap bolady. Bul ekonomıkalyq "D-DAY" bolady jáne bizge barlyq odaqtastarymyzdyń AQSH-pen ıyq tiresip, ırandyq qaýipti oqshaýlaý jáne jeńý úshin birigýi qajet», — dep qosty Tramp.
Sonymen qatar, AQSh prezıdenti Iranda «eshqashan ıadrolyq qarý bolmaıdy» dep taǵy da málimdedi.
Eske salaıyq, buǵan deıin Aq úı basshysy Donald Tramp Truth Social áleýmettik jelisinde Ormýz buǵazy beınelengen jáne «AQSH-tyń jańa aýmaǵy» degen jazýy bar kartany jarıalaǵan edi. Buǵan jaýap retinde Iran SİM basshysynyń orynbasary Kazem Garıbabadı Iran AQSh prezıdentiniń «qate túsinikterin túzetetinin» málimdedi.
Sonymen qatar, amerıkandyq prezıdent qazir AQSh pen Iran arasynda eshqandaı kelissóz júrgizilmeıtinin jáne josparlanbaıtynyn aıtty.