AQSh prezıdenti Donald Tramp Iranmen kelissózderde progreske qol jetkizilgen-jetpegeni aldaǵy bir-eki kúnde belgili bolatynyn málimdedi, dep habarlaıdy infohub.kz saıty.
Times of India basylymynyń habarlaýynsha, jýrnalıserge sóılegen Tramp Iranmen kelissózder «óte jaqsy ótip jatqanyn» atap ótti. Ol sondaı-aq serpilis búgin nemese erteń bolýy múmkin ekenin jetkizdi. «Biz 48 saǵat ishinde bilemiz», — dedi amerıkandyq kóshbasshy.
Bul málimdeme Tramptyń Fox News arnasyna eki taraptyń kúni boıy sozylǵan kelissózder júrgizgenin aıtqanynan keıin jasaldy. AQSh prezıdenti talqylaý barysyn oń baǵalap, eger kelisimge qol jetkizilmese, Irandy «óte kúshti soqqy» kútýi múmkin ekenin eskertti.
Suhbatta Tramp kelissózderdi Ormýz buǵazynyń jumysyn qalpyna keltirýmen tikeleı baılanystyrdy. «Buǵaz jaqyn arada ashylady, áıtpese olar qatty zardap shegedi, sodan keıin buǵaz ashylady», — dedi Aq úıdiń basshysy.
Eske salaıyq, buǵan deıin Donald Tramp Iranmen qazirgi kelissózder olar úshin kelisimge qol qoıýdyń «sońǵy múmkindigi» ekenin málimdegen bolatyn. Sondaı-aq AQSh prezıdenti Irannyń eshqashan ıadrolyq qarýǵa ıe bolmaıtynyn aıtyp, eger Ormýz buǵazy ashylmasa, jańa soqqylar jasaıtynyn eskertti.
Oǵan deıin Tramp Iranǵa shabýyldy toqtatyp, Vashıngton men Tegeran arasyndaǵy kelissózderdi jarıalaǵan edi. Ol Taıaý Shyǵys elderiniń ótinishi boıynsha Iranǵa soqqylardy toqtatý týraly buıryq bergenin jáne Ormýzǵa qatysty jańa kelisimniń múmkindigin aıtqan.