AQSh prezıdenti Donald Tramp Irannyń jeti kúndik atysty toqtatý bastamasyn ashyq túrde qabyldamady. Alaıda Vashıngtonnyń Tegeranǵa deldaldar arqyly beretin túpkilikti jaýaby ázirge jetkizilgen joq, dep habarlaıdy infohub.kz saıty.
RBK agenttiginiń málimetinshe, AQSh kóshbasshysy Irannyń jeti kúnge soǵys qımyldaryn toqtatyp, Ormýz buǵazy arqyly keme qatynasyn qaıta bastaý josparynan bas tartqanyn rastady.
«Men olardyń mámilesinen bas tartamyn. Olar Ormýz buǵazyn dereý ashatyn mámile jasaǵysy keledi, óıtkeni olar kúırete jeńilis taýyp otyr. (...) Olar mámile jasaǵysy keledi. Menińshe, bul qalypty jaǵdaı. Men de mámile jasasýdy unatamyn. Biraq bul mámile qabyldanbaıtyn edi», — dedi Aq úı basshysy Ońtústik kógalda jýrnalıserdiń suraqtaryna jaýap berip.
Sonymen qatar RIA Novostıdiń dereginshe, Iran deldaldardan AQSH-tyń jeti kúndik josparǵa qatysty túpkilikti jaýabyn áli alǵan joq.
«Biz AQSh prezıdentiniń alǵashqy reaksıasyn kórdik, alaıda deldaldar arqyly bizge eshteńe jetkizilgen joq», — dedi Irannyń syrtqy ister mınıstri Abbas Arakchı ırandyq BAQ-qa.
Irandyq mınıstr AQSh prezıdenti kóptegen qarama-qaıshy málimdeme jasaıtynyn qosty.
«Biz deldaldardyń túpkilikti ustanymyn kútemiz, sonyń negizinde sheshim qabyldaımyz», — dep tolyqtyrdy Arakchı.
Ol Ormýz buǵazyn ashý máselesindegi kez kelgen ilgerileý AQSH-tyń Iran qoıǵan sharttardy oryndaýyna baılanysty ekenin málimdedi.
Eske salaıyq, buǵan deıin Iran deldaldar arqyly Tramp ákimshiligine Ormýz buǵazyn bir aptaǵa ashýdy usynǵan bolatyn. Ýaqytsha atysty toqtatý jospary BUU Bas Assambleıasynyń alańynda tanystyrylǵan edi.