AQSh prezıdenti Donald Tramp Irannyń azamattyq ınfraqurylymyna soqqy beretinin eskertti. Eger Tehran kúshteri Ormýz buǵazyndaǵy kemelerge oq jaýdyrsa, áskerıler kópirler men elektr stansıalaryn bombalaıdy, dep habarlaıdy infohub.kz saıty.
Sársenbi kúni jasalǵan bul eskertý is júzinde asyrylsa, qazirdiń ózinde aımaqqa jaıylǵan qaqtyǵystyń odan ári ýshyǵýyna ákeledi. Tramp áleýmettik jelidegi jazbasynda: «Budan bylaı Iran Islam Respýblıkasy Ormýz buǵazyndaǵy kemege zymyran, raketa, ushqyshsyz ushaq nemese kez kelgen basqa qurylǵymen oq atqan saıyn, Amerıka Qurama Shtattary astana Tehrandaǵy nemese onyń mańyndaǵy BİR KÓPİR NEMESE ELEKTR STANSIASYN bombalap, joıady», – dedi.
Buǵan deıin de Tramp Irannyń kópirleri men elektr stansıalaryn bombalaıtynyn, tipti eldiń órkenıetin joıý qaýpin aıtqan edi. Alaıda sársenbidegi málimdeme burynǵylarǵa qaraǵanda naqtyraq. Irannyń jartylaı resmı «Tasnım» agenttigi ırandyq áskerı derekkózge silteme jasap, eger eldiń ınfraqurylymyna shabýyl jasalsa, Tehrannyń dál osyndaı jaýap qaıtaratynyn habarlady. Derekkóz: «Eger amerıkalyqtar Irandaǵy kópir nemese elektr stansıasyn nysanaǵa alsa, Iran aımaqtaǵy ınfraqurylymdarǵa, sonyń ishinde AQSh múddesi bar energetıkalyq nysandarǵa soqqy beredi», – dep málimdegen.
AQSh pen Iran arasyndaǵy shabýyldar sońǵy 12 kún boıy jalǵasýda. Taraptar arasyndaǵy soǵysty toqtatýy tıis ózara túsinistik týraly hattama (MoU) Ormýz buǵazynyń taǵdyryna baılanysty iske aspaı qaldy. Iran strategıalyq sý jolyna óziniń egemendigin talap etip, MoU buǵazdy basqarýǵa ókilettik beretinin aıtady. Al Tramp ákimshiligi Ormýzdyń soǵysqa deıingi halyqaralyq erkin ótkel mártebesine qaıtarylýyn talap etýde.
Oman jaǵalaýyndaǵy buǵazdan Iranmen kelispeı ótken kemelerge shabýyl jasalǵannan keıin qaqtyǵys qaıta jandandy. AQSh áskerı kúshteri Irandaǵy áskerı nysandarmen qatar azamattyq porttar men kópirlerge de soqqy berip, ondaǵan adamdy óltirdi. Tehran aımaqtaǵy AQSh áskerleri ornalasqan bazalarǵa zymyran men raketa jaýdyryp jaýap qaıtardy. Irandyq shabýyldardan Iordanıa men Irakta keminde tórt áskerı qyzmetker qaza taýyp, taǵy birnesheýi jaralandy. Seısenbi kúni keshke Pentagon 28 jastaǵy Enjel Rampersadtyń Iordanıadaǵy ırandyq zymyran soqqysynan qaza tapqan úshinshi adam ekenin anyqtady.
Tramp sársenbi kúni Delaver shtatyndaǵy Doýv áýe bazasynda qaza tapqan áskerılerdiń denelerin qarsy alýǵa qatysady. Ol AQSh áskerlerin óltirgeni úshin Iran «úlken tólem tóleıtinin» aıtyp: «Olar joıylyp jatyr», – degen. Soǵystyń qaıta bastalýy munaı baǵasynyń qaıta kóterilýine sebep boldy. AQSH-ta bir gallon (3,4 lıtr) benzınniń ortasha baǵasy 4 dollardan asty, buǵan deıin bitim kezinde ol 3,80 dollar shamasynda bolǵan edi.