AQSh prezıdenti Donald Tramp Iranǵa jasalatyn aýqymdy áskerı shabýyldy toqtatqanyn jáne «kelisim sharttary» kelisilgenin málimdedi. Bul týraly ol senbi kúni keshke Truth Social platformasynda jazdy. Buǵan deıin amerıkalyq BAQ Vashıngton men Izraıl Irannyń energetıkalyq ınfraqurylymyna soqqy berýge daıyndalyp jatqanyn habarlaǵan edi.
Tramptyń aıtýynsha, bul sheshim Iran men Taıaý Shyǵystaǵy basqa elderdiń «kelisim sharttary kelisilgendikten shabýyldy toqtatý» ótinishine jaýap retinde qabyldanǵan. Ol kelisimniń tez arada jasalýy shartymen kelisken.
Ol kelisim «ORMÝZ BUǴAZYNYŃ DEREÝ, TOLYQ JÁNE TÚPKİLİKTİ ASHYLÝYNA» ákeletinin jáne Irannyń «ıadrolyq qaýpine» núkte qoıatynyn aıtty. Tegeran tarapynan buǵan ázirge resmı jaýap joq.
Senbi kúni tańerteń Iran syrtqy ister mınıstri Abbas Aragchı Saýd Arabıasyndaǵy áriptesine AQSh pen Izraıldiń kez kelgen shabýylyna «laıyqty jaýap» beriletinin aıtqan. Amerıkandyq Axios saıtynyń habarlaýynsha, Saýd Arabıasynyń taq murageri Muhammed bın Salman senbi kúni Trampqa qońyraý shalyp, soqqyny toqtatyp, kelissózderge oralýdy ótingen. Bul týraly máseleden habardar derekkózge silteme jasap, saıt jazdy.
Tramp juma kúni AQSh Iranǵa «qatty soqqy» beretinin aıtqan bolatyn. Senbi kúni AQSh Memlekettik departamenti aımaqtaǵy 10 eldegi amerıkalyqtarǵa qaýipsizdik eskertýlerin jarıalap, shıelenistiń artýyna baılanysty saqtyq sharalaryn kúsheıtýge jáne elden ketýdi qarastyrýǵa shaqyrdy.