Donald Tramp tarıhta alǵash ret árekettegi AQSh prezıdenti retinde 1 dollarlyq monetada beınelendi. Mereıtoılyq moneta eldiń 250 jyldyǵyna oraı shyǵaryldy, dep habarlaıdy infohub.kz.
AQSh teńge saraıy óziniń resmı saıtynda osy mereıtoıǵa arnalǵan bir dollarlyq monetanyń beınesin jarıalady. Vedomstvo málimdemesinde: «Amerıka tarıhyndaǵy mańyzdy kezeń qurmetine uly amerıkandyq muranyń 250 jyldyǵyna arnalǵan resmı mereıtoılyq 1 dollarlyq moneta shyǵaryldy. Monetanyń betki jaǵynda (avers) árekettegi prezıdent Donald Dj. Tramptyń portreti, sondaı-aq LIBERTY, IN GOD WE TRUST jáne 1776 ~ 2026 degen jazýlar beınelengen», — delingen.
Aıta ketý kerek, betki jaǵynyń dızaıny Aq úıdiń jarıalaǵan Tramptyń resmı fotosýreti negizinde jasalǵan. Monetanyń artqy jaǵynda prezıdenttik mór ornalasqan: qyran bir tabanynda záıtún butaǵyn, ekinshisinde jebelerdi ustap tur, keýdesinde «250» degen jazýy bar qalqan, al tumsyǵynda «E PLURIBUS UNUM» («Kópten — bireý») degen uran jazylǵan tý. Sonymen qatar «UNITED STATES OF AMERICA» jáne «ONE DOLLAR» degen jazýlar da bar.
Teńge saraıy ókilderi: «Fıladelfıa teńge saraıynda soǵylǵan monetalar aınalymǵa jaramdy kórinedi, biraq eshqashan aınalymǵa shyǵarylǵan emes. Degenmen, olar áli de zańdy tólem quraly retinde paıdalanyla alady», — dep naqtylady.
CNN-niń atap ótýinshe, AQSH-ta árekettegi prezıdenttiń nemese qazir tiri burynǵy memleket basshysynyń monetalarda beınelenýine tyıym salynǵan. Prezıdenttiń portreti monetada ol qaıtys bolǵannan keıin eki jyldan erte emes paıda bolýy múmkin. Alaıda, AQSH-tyń 250 jyldyǵy qarsańynda Kongres «Aınalymdaǵy koleksıalyq monetalardy qaıta jobalaý týraly» zań qabyldady, ol Qarjy mınıstrligine osy oqıǵanyń qurmetine arnaıy bir dollarlyq monetalar soǵýǵa ruqsat berdi. Zańda mundaı monetalardyń artqy jaǵynda tiri nemese qaıtys bolǵan kez kelgen adamnyń basy men ıyǵynyń nemese bústiniń beınesine, sondaı-aq tiri adamnyń portretine jol berilmeıtini kórsetilgen.
Tramptyń beınesi betki jaǵynda ornalasqan, bul zańnamalyq shekteýdi aınalyp ótýge múmkindik beredi. Osylaısha, Donald Tramp AQSh tarıhyndaǵy monetada beınelengen alǵashqy árekettegi prezıdent atandy.