AQSh prezıdenti Donald Tramp Ontarıo kólin «Amerıka kóli» (Lake America) dep ataý týraly jarlyqqa qol qoıdy, dep habarlaıdy infohub.kz.
Jýrnalıserdiń bul qadammen Kanadaǵa qandaı sıgnal jibergisi keletinin suraǵanyna Tramp: «Eshqandaı» dep jaýap berdi.
Ontarıo kóli — Soltústik Amerıkadaǵy bes Uly kóldiń biri, Kanada men AQSh shekarasynda ornalasqan. Bul Uly kólderdiń eń shyǵysyndaǵy jáne aýdany boıynsha eń kishisi: onyń aýdany shamamen 19 myń sharshy shaqyrym, ortasha tereńdigi — 86 metr, al eń tereń jeri — shamamen 244 metr. Kólmen attas ataý Kanadanyń ortalyǵyndaǵy eń tyǵyz qonystanǵan jáne ekonomıkalyq damyǵan provınsıaǵa da berilgen.
Sheteldik BAQ jazǵandaı, kól memlekettik shekaramen bólingendikten (soltústik jaǵalaýy Kanadaǵa, al ońtústik jaǵalaýy Nú-Iork shtatyna tıesili), Tramp jarlyǵynyń zańdy kúshi tek AQSh aýmaǵy men resmı qujattaryna ǵana taralady.
Bul qadam Vashıngton men Ottava arasyndaǵy saýda qaqtyǵysynyń kúrt ýshyǵýy jáne baj salyǵy boıynsha kelissózderdiń sátsiz aıaqtalýy aıasynda jasalyp otyr.
Buǵan deıin Tramp Truth Social áleýmettik jelisinde AQSh kanadalyq Ontarıo provınsıasymen bıznesti belsendi júrgizýdi jalǵastyrýdy josparlamaıtynyn, sondyqtan ataýdy ózgertý kerektigin málimdegen.
Kanada premer-mınıstri Mark Karnı bul sheshimge qatań qarsylyq bildirdi. Ol kólge ataýdy 400 jyldan astam ýaqyt buryn gýron úndisteri bergenin jáne kanadalyqtar úshin ol «máńgi Ontarıo bolyp qalatynyn» atap ótti.
Buǵan deıin Tramp tarıftik jáne syrtqy saıasaty aıasynda Meksıka shyǵanaǵyn «Amerıka shyǵanaǵy» dep ataýdy tapsyrǵan bolatyn.
Budan buryn «Kýrsıv» Tramp Kanada basshylyǵyn qatty synǵa alyp, kanadalyq saıasatkerlerdi «kloýndar» dep atap, elge ekonomıkalyq qarym-qatynastyń aıtarlyqtaı nasharlaýymen qorqytqanyn jazǵan.